Aqtóbe oblysy Alǵa aýdany Qarabulaq aýylynyń ákimi kóz jumdy. Oqiǵanyń qalai bolǵanyn oblystyq PD baspasóz qyzmeti aityp berdi, dep habarlaidy QazAqparat agenttigi.
Aqtóbe oblysy Alǵa aýdany Qarabulaq aýylynyń ákimi Ernar Mahambetovtiń qaza bolǵany týraly aýyl halqy biledi. Aýyl ákimdigi de oqiǵany rastady. Alaida ákimdikte mán-jaidy aityp beretin maman joq ekenin, ózderi de naqty habar ala almaǵanyn aitty.
«Sizge aqparat beretin adam joq. Munda eki-aq adam jumys isteidi. Biri ákim, ekinshisi maman. Ákimge qatysty aqparatty estip otyrmyz. Oqiǵanyń mán-jaiyn nyqty bilmeimin. Jalpy aýylda negizi 500 adam turady», - dedi Qarabulaq aýyly ákimdiginiń ókili.
Al oblystyq densaýlyq saqtaý basqarmasy ákimniń pyshaq jaraqatyn alyp, kóp qan joǵaltqanyn aitty.
Aýdandyq aýrýhanaǵa jetkizgen kezde onyń kóz jumǵany belgili bolǵan.
Oblystyq PD baspasóz qyzmetiniń habarlaýynsha, oqiǵa 12 jeltoqsan saǵat 00:50-de bolǵan. Alǵa aýdany PB 102 nómirine sharýa qojalyqtarynyń birinde adam ólimi tirkelgeni týraly habar túsken.
«Oqiǵa ornyna jiberilgen jedel-tergeý toby sharýa qojalyǵynyń basshysy men 36 jastaǵy er adam arasynda janjal bolǵanyn anyqtaǵan. Onyń barysynda fermer jábirlenýshiniń ishine pyshaq salǵan. Oqiǵanyń saldarynan 36 jastaǵy er adam qaitys boldy.
Osy fakti boiynsha QR QK 99-babynyń 1-bóligimen qylmystyq is qozǵaldy. Qajetti saraptamalar taǵaiyndaldy, kúdikti qamaýǵa alyndy», - dep habarlady oblystyq PD baspasóz qyzmeti.
Aita keteiik, Ernar Mahambetov 1986 jyly Aqtóbe oblysy Alǵa aýdany, Qarabulaq aýylynda dúniege kelgen.
Eńbek jolyn 2012 jyly Aqtóbe oblysy Muǵaljar aýdany Aqkemer aýyldyq okrýginiń jetekshi mamany bolyp bastaǵan.
2014 jyly Aqkemer aýyldyq okrýgi ákiminiń apparatynda bólimshe basshysy mindetin atqarǵan.
2019 jyldyń 2 sáýir aiynan beri Alǵa aýdany Qarabulaq aýyldyq okrýgi ákimi bolyp eńbek etti.
