Ádep jónindegi keńeste jer komissiiasynyń jumysy men qurylys máselesi qozǵaldy. Aýdan ákiminiń orynbasary balasyna jer telimin bólip bergeni úshin jazalandy, dep habarlaidy "Ult aqparat".
Ádep jónindegi keńeste Baiǵanin aýdany ákiminiń orynbasary, aýdandyq jer qatynastary bóliminiń basshysy, aýdan ákimi apparatynyń bas mamany-zańgerge, Qaraýylkeldi, Ashy, Kóltaban, Qyzylbulaq, Miialy, Jańajol, Jarqamys aýyldyq okrýgteriniń ákimderine qatysty tártiptik is qaraldy.
«Aýdan ákiminiń orynbasary B.Boranbai jer telimin bólý kezinde balasynyń atyndaǵy «Abdýlla» sharýa qojalyǵyna basymdyq berdi. Ol 15 bas maly bar sharýashylyqtyń jaiylymy úshin 2400 ga jer berýge sheshim qabyldaǵan. Sóitip ol komissiia tóraǵasy bola tura múddeler qaqtyǵysyna jol berdi. Sonymen qatar «Raisa», «Tóre» jáne «Nur» ShQ-nyń jeke qarjysy investitsiia emes degen oimen ótinimder komissiia músheleriniń ashyq daýysyna salynbaǵan. Jer komissiiasy músheleri jazbasha pikir bildirý quqyǵyn paidalanbaǵan», - dep habarlady QR Memlekettik qyzmet isteri agenttiginiń Aqtóbe oblysy boiynsha departamentiniń baspasóz qyzmeti.
Bul sheshimdi keibir aýyl ákimi, komissiia múshesi múlde bilmeitin bolyp shyqty.
«Qarjyny investitsiiaǵa jatpaidy degen áńgime múlde aitylmady. Komissiia hatshysy men tóraǵanyń aitýynsha, atalǵan sharýa qojalyǵynyń qujattary tolyq bolmaǵan. Sóitip keri qaitaryldy. Óz basym daýys berýdi usyndym», - dedi Jańajol aýyldyq okrýginiń ákimi.
Ádep jónindegi keńestiń sheshimimen Baiǵanin aýdany ákiminiń orynbasary B.Boranbai, Baiǵanin aýdany ákimi apparatynyń bas mamany-zańger N.Kalmenova, Qaraýylkeldi aýyldyq okrýginiń ákimi J.Abitov, Ashy aýyldyq okrýginiń ákimi S.Qulbatyr, Kóltaban aýyldyq okrýginiń ákimi S.Bitimbai, Qyzylbulaq aýyldyq okrýginiń ákimi J.Taldykov, Miialy aýyldyq okrýginiń ákimi I.Mánibaev, Jańajol aýyldyq okrýginiń ákimi K.Konkaev, Jarqamys aýyldyq okrýginiń ákimi A.Jubanalinge eskertý túrindegi tártiptik jaza qoldaný usynyldy.
Al Baiǵanin aýdandyq jer qatynastary bóliminiń basshysy D.Aýelbaevtiń isi bir jyl ishinde ekinshi ret Ádep keńesinde qaralyp, oǵan memlekettik laýazymynan bosatý túrindegi tártiptik jaza qoldaný týraly sheshim qabyldandy.
Otyrysta Shalqar aýdandyq sáýlet, qurylys, turǵyn-úi kommýnaldyq sharýashylyǵy, jolaýshylar kóligi jáne avtomobil joldary bóliminiń basshysy Q.Kniazbaevtiń eki qabatty jaldamaly turǵyn úidi salý jáne abattandyrý kezindegi jumysy qaraldy. Ol jumys tolyq atqarylmasa da merdigerge aqshany aýdaryp jibergen.
Q.Kniazbaev bir jylda ekinshi ret Ádep keńesine baryp, oǵar laýazymynan bosatý túrindegi tártiptik jaza qoldanyldy. Qobda aýdandyq sáýlet, qurylys, turǵyn-úi kommýnaldyq sharýashylyǵy, jolaýshylar kóligi jáne avtomobil joldary bóliminiń basshysy M.Baiǵabylov dál osyndai qatelik jiberip, eskertý aldy.
