Aqtóbedegi arnaiy operatsiia kezinde qylmystyq toptyń birneshe múshesi quryqtaldy. Olar munai urlaýmen ainalysqan, dep xabarlaidy "Ult aqparat" QR Ulttyq qaýipsizdik komitetine silteme jasap.
«Jeltoqsannyń 7-si kúni Ulttyq qaýipsizdik komiteti, sybailas jemqorlyqqa qarsy Ulttyq biýro men ishki ister ministrligi Aqtóbe oblysynda, eldiń birqatar aimaqtarynda munai urlaý men munai ónimderiniń zańsyz saýdasymen ainalysatyn uiymdasqan qylmystyq toptardy quryqtaý operatsiiasyn bastady. Shuǵyl izdestirý sharalary barysynda munai urlaýmen ainalysqan birneshe adam ustaldy. Olardan munai men munai ónimderi bar avtotsisternalar tárkilendi. Budan bólek, radikaldy salafitterden quralǵan qylmystyq toptyń músheleri qamaýǵa alyndy. Olar munai urlaǵandarǵa «qamqorshylyq» jasaǵan», - delingen resmi xabarlamada.
Ulttyq qaýipsizdik komitetiniń xabarlaýynsha, qazirgi kezde kúdiktiler turatyn úilerde tintý sharalary júrgizilip jatyr. Sondai-aq urlanǵan munaidy zańdastyrýmen ainalysqan kásiporyndar tekserilýde. Komitet tergeýdiń nátijesin jariialaýdy josparlap otyr.
Aita keteiik, búgin buqaralyq aqparat quraldarynda «Aqtóbedegi munai óndirý zaýyty mańaiynda arnaiy operatsiia ótip jatyr» degen aqparat taraǵan bolatyn.
