Aqtóbe oblysy, Temir aýdanynyń ortalyǵy Shubarqudyq aýylynda eki muǵalim tóbelesip, bireýi mert bolǵan edi. Sot úkimimen áriptesin óltirgen pedagog 8 jylǵa bas bostandyǵynan aiyryldy, dep habarlaidy "Ult aqparat".
Oqiǵa 2020 jyldyń 22 qazany kúni boldy. Is materialyna súiensek, sottalýshy ashýǵa boi aldyryp, mas kúiinde áriptesine ashana pyshaǵyn suǵyp alǵan. Bir ǵana soqqydan dene shynyqtyrý pániniń muǵalimi Berik Eltezerov jantásilim etti. Sottalýshy bar kináni moiyndady. Sot otyrysy kezinde kýálerden jaýap alynyp, olar da mán-jaidy túsindirip berdi.
«Jaza taǵaiyndaý kezinde sot «J»-nyń shyn nietpen ókingenin, aiybyn moiyndap, politsiiaǵa barǵanyn, qylmystyq quqyqbuzýshylyqpen keltirilgen moraldyq jáne ózge de ziiandy ótegenin, kámelet jasqa tolmaǵan balalaryn eskerdi. Jábirlenýshi tarap ta keshirim berdi. Sot úkimimen «J» QR QK-niń 99-babynyń 1-bóligimen kináli dep tanylyp, oǵan 8 jylǵa bas bostandyǵynan aiyrý jazasy taǵaiyndaldy. Jazany qylmystyq-atqarý júiesiniń qaýipsizdigi barynsha joǵary mekemesinde óteý belgilendi. Sot úkimi zańdy kúshine engen joq», - dep habarlady oblystyq sottyń baspasóz qyzmeti.
Aita keteiik, pedagogtar arasyndaǵy tóbeles dene shynyqtyrý páni muǵaliminiń úiiniń aýlasynda, túski mezgilde bolǵan.
