Aqtóbede mektep túlegin óltirdi degen kúdikke ilingen "Altyn belgi" iegeri sottalyp jatyr. Politseidiń uly pyshaq jaraqatynan kóz jumdy.
31 tamyzda aldyn ala tyńdaý ótti. Sotta Beknaz K-ge alqabiler sotyn qoldaný usynyldy, alaida ol bas tartty. Sottalýshynyń advokaty sotqa kýágerlerdi – eki qyz ben synyptastaryn shaqyrýdy, tóbeles kezinde Beknaz da jaraqat alǵandyqtan qylmystyq iske ambýlatoriialyq kartany tirkeýdi, sottalýshynyń synyp jetekshisi men oqý isi meńgerýshisiniń oǵan bergen minezdemesin qosýdy, qońyraý derekterin alýdy, áleýmettik jelilerdegi hat-habarlardy tirkeýdi surady, dep jazdy "Aqtóbe taims".
Basylym atap ótkendei, sotta ólgen oqýshynyń ákesi Aqtóbe politsiiasynda jumys isteitini aityldy. Basty sot talqylaýyn 3 qyrkúiekte ótkizý josparlanǵan.
№19 mekteptiń túlegi Azat Dúsipov 17 maýsymda "Aqtóbe" — "Ordabasy" oiynynan keiin birneshe saǵattan soń qaza boldy. Azattyń dostarynyń aitýynsha, kúdikti men marqum sol kúni Ortalyq stadionǵa barǵan, biraq bir-birimen tanys bolmaǵan. Janjal Týrgenev kóshesindegi jataqhana ǵimaratynyń artynda túngi saǵat on ekiniń kezinde shyqqan. 17 jastaǵy jigit tamaǵynan pyshaq jaraqatyn alyp, oblystyq balalar klinikalyq aýrýhanasynda kóz jumdy.
Beknaz K-ge 8 tamyzda, týǵan kúninde aiyptaý aktisi tapsyryldy. Oǵan 99-baptyń 9 jáne 2-bóligi boiynsha aiyp taǵylyp otyr. Bul baptar boiynsha 15 jyldan 20 jylǵa deiin nemese ómir boiy bas bostandyǵynan aiyrý jazasy qarastyrylǵan.
