Foto: Instagram.com/abat_izimgaliuly
Aqtóbe oblystyq qylmys ister jónindegi sot alqasynyń qaýlysymen №2 Aqtóbe qalalyq sotynyń úkimi ózgertildi. Qylmystyq kodekstiń «Alaiaqtyq» baby boiynsha sottalyp, bas bostandyǵynan airylǵan Almaty aýdanynyń burynǵy ákimi Abat Kóbenov túrmeden bosap shyqty, dep habarlaidy QazAqparat agenttigi.
№2 Aqtóbe qalalyq soty Abat Kóbenovti Qylmystyq kodekstiń «Alaiaqtyq» baby boiynsha aiypty dep tanyp, úsh jylǵa bas bostandyǵynan aiyrǵan bolatyn. Is materialy boiynsha ol 2020 jyly qyzmettik ókilettiligin asyra paidalanyp, tanysyna jer telimin berýge ýáde etken. Sol qyzmeti úshin odan 1 383 915 teńge aqy alǵan. Sot úkimimen A. Kóbenov úsh jylǵa bas bostandyǵynan airyldy. Ol ómir boiy memlekettik qyzmette eńbek ete almaityny týraly úkim shyǵaryldy.
«Iske qatysty appeliatsiialyq shaǵym tústi. Appeliatsiialyq sot otyrysy kezinde prokýror A. Kóbenovke qatysty úkimdi ózgertip, aiyppul túrindegi jaza taǵaiyndaýdy surady. Appeliatsiialyq sot otyrysy kezinde de Abat Kóbenov aiypty dep tanyldy. Óz isine ókinip, aqshany túgel qaitarǵanyn aitty. Onyń úsh balasy men kári anasy bar. Sot alqasy osyny eskerip, Abat Kóbenovke qatysty bas bostandyǵynan aiyrý jazasyn alyp tastady», - dep habarlady Aqtóbe oblystyq sotynyń baspasóz qyzmeti.
Endi A. Kóbenov 13 mln teńgeden astam aiyppul tóleidi. Appeliatsiialyq qaýly zańdy kúshine endi.
