Aqtóbede «Brakoner» jedel-aldyn alý sharasy kezinde 167 dana kiik múiizi tárkilendi, dep habarlaidy "Ult aqparat".
Politsiia Shalqar aýdanynyń Begimbet kentinde 36 jastaǵy jergilikti turǵyn men 28 jastaǵy Qyzylorda oblysy Aral aýdanynyń turǵynyn ustady.
«Memlekettik tirkeý nómiri joq «Planeta-3» markaly mototsikldi tintý barysynda 167 dana kiik múiizi bar qap tárkilendi. Budan basqa, úi qoimasy bólmesinen 12 kalibrli «IJ-18mm» bir uńǵyly ańshylyq myltyǵy jáne 12 patron, as bólmesinen salmaǵy 5 keli kiik eti tabyldy. Qylmystyq kodekstiń 339-baby 1-tarmaǵy, iaǵni, «Sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan ósimdikter men janýarlardyń túrlerin, olardyń bólikterin nemese derivattaryn zańsyz paidalaný» baby boiynsha sotqa deiingi tergeý amaldary bastaldy. Kúdiktiniń biri ýaqytsha ustaý izoliatoryna qamaldy. Kiik múiizderin kóterme satyp alýmen jáne olardy jaqyn shetelderge ótkizýmen ainalysatyn adamdardy anyqtaýǵa baǵyttalǵan jedel-izdestirý sharasy júrgizilip jatyr», - dedi oblystyq PD baspasóz qyzmetiniń jetekshisi Erbolat Sarqulov.
