Qostanai jáne Aqtóbe oblysynda májbúrli túrde mal baǵyp, quldyqta kún keshken eki azamat qutqaryldy, dep habarlaidy "Ult aqparat".
«Qostanai oblysynda májbúrli eńbekke tartý faktisi tirkeldi. Sharýa qojalyǵy bar adam eki jarym jyl boiy oblystyń 21 jastaǵy turǵynyn májbúrli túrde jumys istetip kelgen. Jas jigitke qoi, siyr men jylqy baqtyrǵan», - dedi baspasóz máslihatynda IIM baspasóz qyzmetiniń qyzmetkeri Kámil Ǵaliev.
Bul iske qatysty Qylmystyq kodekstiń 126-baby 3-bóligi 2-tarmaǵy boiynsha (zańsyz bas bostandyǵynan aiyrylǵan adamdy qanaý) sotqa deiingi tergeý amaldary bastaldy. Al zardap shekken jigit daǵdarys ortalyǵyna jetkizilgen. Oǵan qajetti kómek kórsetilip jatyr.
«Aqtóbe oblysynda da osyǵan uqsas qylmys boiynsha politsiiaǵa sharýa qojalyq iesi jetkizildi. Ol Ózbekstannan kelgen 58 jastaǵy azamattyń qujatyn tartyp alyp, kúsh kórsetip, bir jyl boiy májbúrli túrde eńbekke jegip kelgen. Zardap shekken azamat qoi baǵyp, saraida ómir keshken. Qazir bul iske qatysty Qylmystyq kodekstiń 128-baby boiynsha (Adam saýdasy) sotqa deiingi tergeý amaldary bastaldy», - deidi ol.
