Aqtóbe politsiiasy túrmeden qashyp, boi tasalaǵan qylmyskerli qalai qolǵa túsirgenin aityp berdi, dep habarlaidy "Ult aqparat".
Aqtóbe oblystyq politsiia departamentiniń qyzmetkerleri Aqtóbe qalasynda jedel izdestirý is-sharalaryn júrgizý kezinde 34 jastaǵy Almatydaǵy tergeý izoliatorynan qashyp ketken sottalǵan Damir Davýtovty ustady. Departament málimetine súiensek, sottalǵan D.Davýtov qoǵamdyq qorǵaýshymen júzdesý úshin kezdesý bólmesine shyǵarylǵan. Kezdesý ótkizgennen keiin ol dárethanaǵa barýǵa ruqsat surap, túnde sol kezdesý bólmesinde tyǵylyp qalǵan. Odan ári esik qulpyn buzyp, ákimshilik ǵimarattyń akt zalyna kirip, qosalqy shyǵý esigindegi temir qulypty syndyrady. Mekemeniń ákimshilik ǵimaratynyń aldyndaǵy qorshaýdan sekirip, qashyp ketken.
«Jazasyn óteýshiniń 11 shaǵyn aýdandaǵy páterlerdiń birinde jasyrynyp jatqany anyqtaldy. Politsiia qyzmetkerleriniń óz erkimen berilý týraly eskertýin elemedi. Keiin arnaiy qyzmetkerler jumyldyrylyp, olar ekinshi qabattyń balkony arqyly páterge kirip, qylmyskerdi ustady. Sondai-aq, jaýap alý kezinde Davýtov qashqannan keiin taksimen Taraz qalasyna jetkenin jáne shamamen 5 kún buryn jol boiy kezikken kóliktermen Aqtóbe qalasyna jetkenin, odan ári jaldamaly páterlerde turǵanyn aitty. Sottalǵan Davýtov QR QPK-niń 128-babynyń tártibimen Aqtóbe qalalyq ýaqytsha ustaý izoliatoryna qamaldy», - dedi oblystyq PD baspasóz qyzmetiniń jetekshisi Erbolat Sarqulov.
Aita keteiik, qylmysker buryn birneshe ret sottalǵan. Osy joly urlyq pen alaiaqtyǵy úshin 6 jylǵa bas bostandyǵynan aiyrylǵan.
