Aqtóbe oblysynyń ekologiialyq problemalaryn sheshýge baǵyttalǵan 33 is-shara bekitildi, dep habarlaidy QazAqparat.
Úkimet otyrysynda Ekologiia geologiia jáne tabiǵi resýrstar ministri Maǵzum Myrzaǵaliev Aqtóbe oblysynyń ekologiialyq problemalardy sheshýge baǵńyttalǵan Jol kartasynda 33 is-shara kózdelgenin málim etti. Negizgi is-sharalar kelesi jumystardy kózdeidi: Aqtóbe ferroqorytpa zaýytynda ekologiialyq maqsatta jańǵyrtý jumystaryn júrgizý, Aqtóbe qalasyndaǵy kárizdik tazartý keshenin qaita jańartý, kógaldandyrý, ózen arnalaryn tazartý, Kókjidedegi jerasty sýyna monitoring zertteýin uiymdastyrý, burynǵy Alǵa himiia zaýytynyń qaýipti qaldyqtaryn joiý, 8 jańa poligon salý jáne eskilerin rekýltivatsiialaý.
Bul máselege bailanysty óńir basshysy Ońdasyn Orazalin rasynda da, Aqtóbe qalasy aýa sapasy jaǵynan qolaisyz qalalardyń biri ekenin atap ótti.
«Atmosferany lastaýshy negizgi eki faktor bar: birinshisi, káriz júiesiniń tozǵany, ekinshisi qala aýmaǵynda ornalasqan «Aqtóbe-Ferroqorytpa» zaýytynyń shyǵaryndylary. «Aqtóbe-Ferroqorytpa» zaýytyna toqtalsaq, qazirgi tańda №1 jáne №2 tsehtardyń gazdan tazartý júiesin qaita tazartý júiesin qaita jańǵyrtý jobasy júzege asyrylýda. Bul jumystardy 2022 jyly aiaqtaý josparlanǵan. Osynyń nátijesinde beiorganikalyq shyǵaryndylary 20 paiyzǵa deiin azaitylady», - dedi ol.
Ákimniń aitýyna qaraǵanda káriz júielerinen bólinetin kúkirtsýtegi shyǵaryndylaryn azaitý maqsatynda qazirgi tańda qalada birqatar shara qabyldanyp jatyr.
«Kásiporyndardyń qaladaǵy káriz júiesine sarqyn sý aǵyzýyn baqylaý kúsheitildi. Kásiporyndar jelige maidy tutyp qalýshy, sondai-aq jergilikti tazartý qurylǵysyn ornatyp jatyr. Osyǵan qosa Aqtóbe qalasyndaǵy tazartý qurylǵylary keshenindegi qazirgi sý qubyrlaryn jańartý bastaldy. Kúkirtsýtegi shyǵaryndylaryn basýǵa alǵashqy ret Tatarstannyń Qazan qalasynan totalizatordy alǵyzyp, biyl qoldandyq. Nátijesi jaman emes. Kárizdik sorǵy stansalarynyń jeldetý júiesine jeldetý jumystary júrgizilip, kómir súzgileri ornatylyp jatyr. Biraq sonymen qatar máseleniń negizgi sheshimi – tazartý qurylǵylary keshenin qaita jańǵyrtý», - dedi ol.
