Aqtóbe oblysynda Ekologiia departamentiniń burynǵy basshysy para alǵany úshin sottaldy, - dep habarlaidy "Ult aqparat" Sybailas jemqorlyqqa qarsy is-qimyl agenttigi málimetine silteme jasap.
"2022 jyldyń 13 sáýirinde Aqtóbe qalasynyń 2 sotynyń úkimimen oblystyq ekologiia departamentiniń burynǵy basshysy Nurjan Aqqul aitarlyqtai mólsherde para alý deregi boiynsha kináli dep tanyldy. Ol 12 million teńge somasynda aiyppul tóleidi", - delingen agenttik taratqan aqparatta.
Sonymen qatar eks-basshy memlekettik organdarda qyzmet atqarý quqyǵynan ómir boiyna airyldy.
Nurjan Aqqul 2021 jyldyń 19 jeltoqsanynda Aqtóbe oblysynyń ekologiia departamentiniń basshysy retinde kásipkerlik sýbektisi direktorynan 400 myń teńge somasyndaǵy para alǵany úshin ustalǵan. Ony Aqtóbe oblysy boiynsha Sybailas jemqorlyqqa qarsy qyzmet ustady.
Ol parany birinshi sanattaǵy obektiler úshin emissiialardyń qorshaǵan ortaǵa áser etýine ruqsat berýi jáne jalpy qamqorlyq kórsetýi úshin alǵan.
