Foto: Úkimet
Aktivterdi qaitarý: aýyldyq jerlerde meditsinalyq infraqurylym salýǵa 144 mlrd teńgeden astam qarjy bólindi, dep habarlaidy Ult.kz.
Úkimettiń basym mindetteriniń biri – halyqty sapaly jáne qoljetimdi densaýlyq saqtaý qyzmetterimen qamtamasyz etý. Osy baǵytty júzege asyrý jáne Prezidenttiń áleýmettik infraqurylymdy damytý jónindegi tapsyrmasyn oryndaý maqsatynda Aqtóbe oblysy Qobda aýdany Begaly aýylynda jańa meditsinalyq pýnkt ashyldy.
Nysan «Aýylda densaýlyq saqtaýdy jańǵyrtý» ulttyq jobasy aiasynda salynǵan nysannyń jalpy quny – 132 mln teńge, onyń 65 mln teńgesin Úkimet Arnaýly memlekettik qordan bóldi.
Aýdany 150 sharshy metrden asatyn jańa ǵimarat bir aýysymda 25 kelýge arnalǵan. Meditsinalyq pýnktti paidalanýǵa berý aýyldyń 300-den astam turǵynyn sapaly jáne ýaqtyly meditsinalyq kómekpen qamtamasyz etýge múmkindik beredi. Nysan zamanaýi qurylǵylarmen jabdyqtalǵan.
Qurylys kezinde inkliýzivtilikke, qimyl-qozǵalysy shekteýli adamdardyń qoljetimdiligin qamtamasyz etýge kóńil bólindi.
Meditsinalyq nysannyń ashylýy aýyl turǵyndarynyń alǵashqy meditsinalyq-sanitariialyq kómekke qoljetimdiligin arttyrady, sondai-aq meditsina qyzmetkerleriniń eńbek jaǵdaiyn jaqsartady.
Aqtóbe oblysynda qaitarylǵan aktivter qarajaty esebinen qurylǵan Arnaýly memlekettik qordan aýyldyq densaýlyq saqtaý salasy boiynsha barlyǵy 11 joba júzege asyrylýda. Búgingi tańda 5 nysan paidalanýǵa berildi, altaýynyń qurylysy jalǵasýda.
Qaitarylǵan aktivter qarajatyn paidalana otyryp, densaýlyq saqtaý salasyn damytý jumystary búkil el boiynsha júrgizilýde. 2024-2025 jyldar aralyǵynda densaýlyq saqtaý nysandaryn salýǵa jáne jańǵyrtýǵa Arnaýly memlekettik qordan 144,2 mlrd teńge bólindi. Infraqurylymdy aýqymdy jańartý aýyl turǵyndaryn qalaǵa barmai-aq sapaly meditsinalyq qyzmetter men tekserýlerge qoljetimdilikpen qamtýdy keńeitýge múmkindik berdi.
Jalpy, «Aýyldyq densaýlyq saqtaýdy jańǵyrtý» ulttyq jobasy aiasynda 2022-2025 jyldar aralyǵynda aýyldyq jerlerde 813 densaýlyq saqtaý nysany, onyń 620 alǵashqy meditsinalyq-sanitariialyq kómek nysany salyndy. Naqtyraq aitsaq, 2024 jyly 392 nysan paidalanýǵa berilse, 2025 jylǵa qosymsha 188 nysandy salý josparlanǵan.
Zamanaýi aýdanaralyq aýrýhanalar men MSAK jelisin damytý ult densaýlyǵynyń kórsetkishterin tikelei jaqsartty. Osylaisha, onkologiialyq aýrýlardy erte anyqtaý 3,5%-ǵa ósip, 32,6%-dy qurady, al 60%-dan astamy bastapqy satysynda diagnoz qoiylady. 23-i aýdandyq aýrýhanalarda ornalasqan 83 insýlt ortalyǵynyń jumysy tromboliz úlesin 6%-ǵa deiin arttyrýǵa múmkindik berdi. Sonymen qatar jańa mamandandyrylǵan ortalyqtardyń ashylýy balalarǵa ońaltý kómeginiń qoljetimdiligin edáýir arttyrdy.
Meditsina infraqurylymyn jáne qyzmet kórsetý sapasyn jaqsartý jónindegi keshendi sharalar aýyl turǵyndarynyń ómir súrý uzaqtyǵyna oń áserin tigizdi, kórsetkish 2024 jyldyń qorytyndysy boiynsha 74,2 jasqa uzarǵan.
