Aqtóbe oblysynyń ákimi Ońdasyn Orazalin aýrýhanada jatqan qatardaǵy jaýynger Vasilii Larichevtiń jaǵdaiyn bildi, dep habarlaidy QazAqparat.
QR Ulttyq ulany «Batys» óńirlik qolbasshylyǵynyń baspasóz hatshysy, podpolkovnik Erbolat Sultanovtyń málim etkenindei, 6655-áskeri bóliminiń sarbazy V.Larichev Aqtóbedegi qaqtyǵys kezinde basynan aýyr jaraqat alǵan bolatyn.
Oblystyq aýrýhanaǵa kelgen óńir basshysy zańsyz mitingi kezinde qyzmettesin qorǵap, batyldyq tanytqan sarbazǵa alǵysyn bildirdi.
«Batys» óńirlik qolbasshysynyń orynbasary Pavel Sitnikov erjúrek jaýynger V.Larichevke kúreń kókireksheniń airyqsha belgisin tabys etti.
Aqtóbede áskeri boryshyn ótep jatqan V.Larichev – Almaty oblysy Qarasai aýdany Qaskeleń aýylynyń týmasy. Ol qaqtyǵys kezinde qatar turǵan sarbazdy jaýyp úlgerip, ózi basynan aýyr jaraqat alyp, jedel járdemmen aýrýhanaǵa jetkizilgen.
Aqtóbedegi 6655-áskeri bóliminiń jeke quramy 5 qańtar kúni oblys ákimdigi ǵimaratyn qorǵaǵan bolatyn.
Qazirgi kezde oblysta jaǵdai turaqty. Degenmen politsiia men Ulttyq ulan jaýyngerleri qala kóshelerinde qoǵamdyq tártipti qamtamasyz etýde. Óńirde komendanttyq ýaqyt (23.00-den tańǵy 07.00-ge deiin) kúshinde.
