Foto: qazaly.kz
Bir muǵalimniń 5 pán boiynsha sabaq berýin tolyq toqtattyq. Bul týraly Aqtóbe oblysynyń ákimi Eraly Toǵjanov aitty, dep habarlaidy QazAqparat.
«Eń úlken máseleniń biri – aýylda adam qalsyn desek, internetti tolyq engizý kerek. Internet bolmasa, búgin aýylda jastardyń da turmaityny belgili. Nege? Sebebi, bul – ómir men ýaqyttyń talaby. Sondyqtan ótkende ministr Baǵdat Mýsinmen birge 99%-ǵa deiin internetpen qamtýdyń jobasyn daiyndadyq. Ony iske qossaq, telemeditsinany da engizýge úlken múmkindik bolady», - dedi Toǵjanov Senattaǵy «Tiimdi óńirlik saiasat – elimizdiń ornyqty áleýmettik-ekonomikalyq damýynyń negizi» taqyrybyndaǵy parlamenttik tyńdaýda.
Sonymen qatar ol bilim berýge jaǵdai jasaý qadamdaryna toqtaldy.
«Sondyqtan biz Bilim All jobasyn engizdik. Bir muǵalimniń 5 pán boiynsha sabaq berýin tolyq toqtattyq. Endi bul ashyǵyn aitqanda ózimizdi de, balalardy aldaý dep oilaimyn. Sondyqtan bul toqtatyldy. Onlain rejimde 36 eń joǵary deńgeili muǵalim sabaq beretin jobany bastap kettik. Biz aýyldaǵy muǵalimderdi qysqartqan joqpyz», - dedi oblys ákimi.
Osy oraida ol atalǵan joba aiasynda sol aýyldaǵy muǵalimniń ózi joǵary deńgeili ustazdardyń sabaǵyn balalarmen birge tyńdap, óz deńgeiin kóteretinin aitty.
«Ony nege engizdik? Sebebi, búginde aýyldaǵy balalardyń bilim deńgeii qaladaǵy bilim deńgeiinen 15%-ǵa tómen. Sondyqtan osy másele óte mańyzdy. Jobany 5 pán boiynsha engizdik: matematika, fizika, himiia, biologiia jáne aǵylshyn sabaqtary boiynsha. Osylaisha, kadr máselesi sheshildi», - Toǵjanov.
