Aqtóbeniń shetindegi Mahambet atalatyn bóliginde 16 sáýirde sý basqan úilerdiń biri. 18 sáýir 2017 jyl.
Aqtóbede tasqyn sýdyń beti qaityp, iri sý qoimalary qalypty jumys rejimine kóshti, dep habarlady Azattyqqa oblys ákiminiń baspasóz qyzmeti.
Sý tasyǵan kúnderi Elek pen Qarǵalynyń jaǵalaýyndaǵy eldi-mekender men saiajailardan 1907 adam evakýatsiialanǵan. Sonyń 789-y mektepterdiń sport zaldaryn ýaqytsha panalap otyr. 1118 adam týystarynyń úiinde turyp jatyr.
Sý alǵan úilerdegi ylǵal áli tolyq keppegen. Sondyqtan turǵyndar óz úilerine orala almai otyr. Sý basqan aýdandarda qazir úi ielerimen birge eriktiler de jumys istep jatyr.
"Sý qoimalarynan ózenderge sý jiberilip jatqan joq. Shliýzder jabyldy. 20 sáýirden bastap eki iri sý qoimasy qalypty jumys rejimine kóshti" delingen ákimdikten joldanǵan habarlamada.
Aqtóbede 16 sáýirde Elek ózeniniń tasýynan negizinen ózen jaǵalaýyndaǵy saiajai ujymdaryna qarasty júzdegen úidi sý basyp, qalada tótenshe jaǵdai jariialanǵan. Aqtóbe oblystyq tómenshe jaǵdailar departamentiniń sońǵy aqparatyna qaraǵanda, tótenshe oqiǵadan Aqtóbeniń irgesindegi Kirpishti, Keleshek, Mahambet, Qarǵaly, Zarechnyi-2, Jilianka eldi mekenderinde 650-ge tarta úi men aýlany sý basyp, 5 úi qulaǵan.
