اقتٶبەنٸڭ شەتٸندەگٸ ماحامبەت اتالاتىن بٶلٸگٸندە 16 سەۋٸردە سۋ باسقان ٷيلەردٸڭ بٸرٸ. 18 سەۋٸر 2017 جىل.
اقتٶبەدە تاسقىن سۋدىڭ بەتٸ قايتىپ, ٸرٸ سۋ قويمالارى قالىپتى جۇمىس رەجيمٸنە كٶشتٸ, دەپ حابارلادى ازاتتىققا وبلىس ەكٸمٸنٸڭ باسپاسٶز قىزمەتٸ.
سۋ تاسىعان كٷندەرٸ ەلەك پەن قارعالىنىڭ جاعالاۋىنداعى ەلدٸ-مەكەندەر مەن ساياجايلاردان 1907 ادام ەۆاكۋاتسييالانعان. سونىڭ 789-ى مەكتەپتەردٸڭ سپورت زالدارىن ۋاقىتشا پانالاپ وتىر. 1118 ادام تۋىستارىنىڭ ٷيٸندە تۇرىپ جاتىر.
سۋ العان ٷيلەردەگٸ ىلعال ەلٸ تولىق كەپپەگەن. سوندىقتان تۇرعىندار ٶز ٷيلەرٸنە ورالا الماي وتىر. سۋ باسقان اۋدانداردا قازٸر ٷي يەلەرٸمەن بٸرگە ەرٸكتٸلەر دە جۇمىس ٸستەپ جاتىر.
"سۋ قويمالارىنان ٶزەندەرگە سۋ جٸبەرٸلٸپ جاتقان جوق. شليۋزدەر جابىلدى. 20 سەۋٸردەن باستاپ ەكٸ ٸرٸ سۋ قويماسى قالىپتى جۇمىس رەجيمٸنە كٶشتٸ" دەلٸنگەن ەكٸمدٸكتەن جولدانعان حابارلامادا.
اقتٶبەدە 16 سەۋٸردە ەلەك ٶزەنٸنٸڭ تاسۋىنان نەگٸزٸنەن ٶزەن جاعالاۋىنداعى ساياجاي ۇجىمدارىنا قاراستى جٷزدەگەن ٷيدٸ سۋ باسىپ, قالادا تٶتەنشە جاعداي جارييالانعان. اقتٶبە وبلىستىق تٶمەنشە جاعدايلار دەپارتامەنتٸنٸڭ سوڭعى اقپاراتىنا قاراعاندا, تٶتەنشە وقيعادان اقتٶبەنٸڭ ٸرگەسٸندەگٸ كٸرپٸشتٸ, كەلەشەك, ماحامبەت, قارعالى, زارەچنىي-2, جيليانكا ەلدٸ مەكەندەرٸندە 650-گە تارتا ٷي مەن اۋلانى سۋ باسىپ, 5 ٷي قۇلاعان.
