Aqtóbe oblysynyń Hromtaý aýdanyndaǵy «Vesenne – Aralchinskii» jerasty kenishindegi qaiǵyly oqiǵanyń sebep-saldary belgili boldy, dep habarlaidy "Ult aqparat".
QR Eńbek jáne halyqty áleýmettik qorǵaý ministrligi baspasóz qyzmeti taratqan aqparatqa qaraǵanda, qaiǵyly oqiǵa 2020 jylǵy 30 jeltoqsanda keshke jarylys jumystaryn oryndaý kezinde bolǵan.
Oqiǵa saldarynan «Aqtóbe Mys kompaniiasy» JShS qyzmetkerleri: taý-ken sheberi Ashat Qaiqanov, jarýshylar Rýstam Shámetov pen Denis Chernyi, jerasty ózdiginen júretin mashinalardyń mashinisi Berik Jaqypov qaza tapty.
Oqiǵanyń mán-jaiyn tergep-tekserý úshin QR Eńbek jáne halyqty áleýmettik qorǵaý ministrligi (budan ári – Eńbekmini) qurǵan komissiia 4 jumysshynyń qaza bolýynyń negizgi sebepterin anyqtady. Osy maqsatta Eńbekmini Aqtóbe oblysy boiynsha bas memlekettik eńbek inspektory Salamat Amanbaevtyń tóraǵalyǵymen arnaiy komissiia qurdy.
«Osy jazataiym oqiǵaǵa ákep soqqan mán-jailardy jan-jaqty jáne obektivti zerdelep, kýágerlerden suraý barysynda jinalǵan barlyq dálelder bazasyn nazarǵa ala otyryp jáne jumys berýshiniń tehnikalyq qujattamasy men materialdaryn zerdeleý nátijeleri boiynsha komissiia qaiǵyly oqiǵa óndirispen bailanysty degen qorytyndyǵa keldi»,-delingen habarlamada.
Komissiia mynadai negizgi sebepterdi anyqtady: jumyskerler qaýipsizdik talaptaryn óreskel túrde buzǵan, jumys berýshi eńbek qaýipsizdigi jáne eńbekti qorǵaý erejelerin buzǵan, jumys óndirisi talapqa sai uiymdastyrylmaǵan.
«Komissiia músheleri qaza tapqan qyzmetkerlerdiń týystarymen kezdesip, olarǵa qoldanystaǵy zańnamaǵa sáikes áleýmettik qorǵaýǵa zańdy quqyqtaryn túsindirdi. Arnaiy tergep-tekserý materialdary protsestik sheshimder qabyldaý úshin Aqtóbe qalasynyń quqyq qorǵaý organdaryna berildi»,-dep habarlady mnistrliktiń baspasóz qyzmeti.
