Aqtóbe oblysy Yrǵyz aýdany Nura aýylynda siyr eki basty buzaý týdy. Kóp uzamai ony iesi baýyzdap tastaǵan, dep habarlaidy QazAqparat.
Buzaýdyń videosyn áleýmettik jelige osy aýdannyń týmasy Nurbolat Týysbaiuly salǵan.
«Balalyq shaǵym ótken aýylda eki basty buzaý dúniege kelipti. Aqtóbe oblysy, Yrǵyz aýdany, Nura sovhozy. Klastastarymnyń chatynan uqqanym, aýyl halqynda úrei bar siiaqty. Ekologiianyń belgisi me eken?..», - dep alańdaýshylyq bildirdi ol.
Nura aýylyndaǵy buzaý iesi qandai da bir aqparat berýge qarsy. Al mal dárigeri baýyzdap tastaýǵa keńes bergen.
«Bul 2-3 kúndikte boldy. Siyr 10 naýryz kúni túnde týǵan. Mal iesi ony 11 naýryz kúni tańda kórdi. Siyrdyń ony qalai týǵany bárimizge túsiniksiz bolyp tur. Iesi sol kúni maǵan messendjer arqyly jiberip, jaǵdaidy habarlady. Ózim sol kezde aýdanda jiynda edim. Baýyzdap tastaýǵa keńes berdim. Óitkeni buzaý basyn kótere almaǵan. Buzaýdy baýyzdaǵan soń kómip tastady. Zertteýdiń qajeti joq», - deidi Nura aýyldyq okrýgi veterinarlyq pýnkt meńgerýshisi Ámir Ótegen.
