Aqtóbe oblysynda jedel pnevmoniia juqtyrǵandar sany maýsym aiynda alty ese kóbeigen.
«Jaǵdai qiyndap ketkendikten Aqtóbedegi 3 statsionar bazasynan pýlmonologiia bólimin jasaqtap, kereýet sanyn 446-ǵa deiin kóbeitýge májbúr boldyq» deidi oblystyq densaýlyq saqtaý basqarmasy basshysynyń mindetin atqarýshy Svetlana Esenamanova.
Densaýlyq saqtaý basqarmasynyń málimetinshe, maýsym aiy bastalǵaly 650 adamǵa jedel pnevmoniia diagnozy qoiylǵan.
- Aqtóbede pnevmoniiany emdeitin dáriger jetispei jatyr. Ótken túni 10 dárigerdiń jumysyn 4 adam atqardy. Úsh statsionardaǵy qiyn ahýaldy kórip, jumys isteýden bas tartyp jatqan dárigerler de bar. Osyǵan orai emhanalardaǵy josparly jumysty tolyǵymen toqtatyp, ondaǵy mamandardy pýlmonologiia bólimderine tartý týraly buiryq shyǵardym, - deidi Aqtóbe oblystyq densaýlyq saqtaý basqarmasy basshysynyń mindetin atqarýshy Svetlana Esenamanova.
Sońǵy úsh táýlikte Aqtóbe oblysynda jedel pnevmoniiadan 8 adam qaza bolǵan. 22 adam hal ústinde jatyr. Pnevmoniia juqtyrǵandardyń arasynda meditsina qyzmetkerleri de kóp. Jaǵdaiy kúrt qiyndaǵan 16 naýqasty dárigerler jasandy tynys alý apparatyna qosýǵa májbúr bolǵan.
Jedel pnevmoniiany emdeý úshin jasaqtalǵan úsh statsionardyń biri Aqtóbedegi temirjol aýrýhanasynda ornalasqan. Juma kúni tús álpetinde aýrýhana janynda týystarynyń haline alańdap jylap-syqtap júrgender óte kóp boldy. Tósek tartyp qalǵan týysynyń jaǵdaiyn bile almai júrgender ákimdikke, densaýlyq saqtaý basqarmasyna habarlasý múmkin emesin aitady.
Azattyq tilshisine suqbat bergen qala turǵyny Erjan Ońǵarbaidyń 67 jastaǵy ápkesi osydan úsh kún buryn pnevmoniiadan qaitys bolǵan. Marqumnyń 36 jastaǵy balasy da pýlmonologiia bóliminde hal ústinde jatyr.
- Jienimniń jaǵdaiy aýyr. Dárigerlermen sóileseiin desem, tań atqaly jaýap beretin bir adamǵa jolyǵa almai turmyn. Jaǵdaiy meniń jienimnen góri táýirleý, sóilei alatyn naýqastar dáriger de, medbike de jetispeidi deidi. Bulai bolmaidy ǵoi! Qinalyp jatqan adamdardy dárigerler emdeýi kerek emes pe? - deidi Erjan Ońǵarbai.
Aqtóbe oblystyq densaýlyq saqtaý basqarmasynyń dereginshe, pnevmoniiamen aýrýhanaǵa túsken patsientterden COVID-19 tabylmaǵan. Biraq eki aýrýdyń belgileri óte uqsas. Buryn-sońdy mundai jaǵdaimen kezdespegen dárigerler jappai pnevmoniianyń COVID-pen bailanysy bar-joǵyn aita almai otyr.
19 maýsym kúngi málimet boiynsha, Aqtóbe oblysynda barlyǵy 853 adamnan koronavirýs tabylǵan: 588 adamda aýrý belgileri bar, 265 adamnan COVID-19 belgisi baiqalmaǵan. Resmi málimet boiynsha, koronavirýstan bir adam qaitys bolǵan. Buǵan deiin Aqtóbe oblysynda koronavirýs juqtyrǵan úsh adamnyń qaitys bolǵany habarlanǵan. Biraq keiinirek ólim-jitimdi zertteý komissiiasy olardyń "koronavirýstan qaitys bolmaǵanyn" aitqan.
Jańagúl Júrsin, Azattyq
