اقتٶبە وبلىسىندا جەدەل پنەۆمونييا جۇقتىرعاندار سانى ماۋسىم ايىندا التى ەسە كٶبەيگەن.
«جاعداي قيىنداپ كەتكەندٸكتەن اقتٶبەدەگٸ 3 ستاتسيونار بازاسىنان پۋلمونولوگييا بٶلٸمٸن جاساقتاپ, كەرەۋەت سانىن 446-عا دەيٸن كٶبەيتۋگە مەجبٷر بولدىق» دەيدٸ وبلىستىق دەنساۋلىق ساقتاۋ باسقارماسى باسشىسىنىڭ مٸندەتٸن اتقارۋشى سۆەتلانا ەسەنامانوۆا.
دەنساۋلىق ساقتاۋ باسقارماسىنىڭ مەلٸمەتٸنشە, ماۋسىم ايى باستالعالى 650 ادامعا جەدەل پنەۆمونييا دياگنوزى قويىلعان.
- اقتٶبەدە پنەۆمونييانى ەمدەيتٸن دەرٸگەر جەتٸسپەي جاتىر. ٶتكەن تٷنٸ 10 دەرٸگەردٸڭ جۇمىسىن 4 ادام اتقاردى. ٷش ستاتسيونارداعى قيىن احۋالدى كٶرٸپ, جۇمىس ٸستەۋدەن باس تارتىپ جاتقان دەرٸگەرلەر دە بار. وسىعان وراي ەمحانالارداعى جوسپارلى جۇمىستى تولىعىمەن توقتاتىپ, ونداعى مامانداردى پۋلمونولوگييا بٶلٸمدەرٸنە تارتۋ تۋرالى بۇيرىق شىعاردىم, - دەيدٸ اقتٶبە وبلىستىق دەنساۋلىق ساقتاۋ باسقارماسى باسشىسىنىڭ مٸندەتٸن اتقارۋشى سۆەتلانا ەسەنامانوۆا.
سوڭعى ٷش تەۋلٸكتە اقتٶبە وبلىسىندا جەدەل پنەۆمونييادان 8 ادام قازا بولعان. 22 ادام حال ٷستٸندە جاتىر. پنەۆمونييا جۇقتىرعانداردىڭ اراسىندا مەديتسينا قىزمەتكەرلەرٸ دە كٶپ. جاعدايى كٷرت قيىنداعان 16 ناۋقاستى دەرٸگەرلەر جاساندى تىنىس الۋ اپپاراتىنا قوسۋعا مەجبٷر بولعان.
جەدەل پنەۆمونييانى ەمدەۋ ٷشٸن جاساقتالعان ٷش ستاتسيوناردىڭ بٸرٸ اقتٶبەدەگٸ تەمٸرجول اۋرۋحاناسىندا ورنالاسقان. جۇما كٷنٸ تٷس ەلپەتٸندە اۋرۋحانا جانىندا تۋىستارىنىڭ حالٸنە الاڭداپ جىلاپ-سىقتاپ جٷرگەندەر ٶتە كٶپ بولدى. تٶسەك تارتىپ قالعان تۋىسىنىڭ جاعدايىن بٸلە الماي جٷرگەندەر ەكٸمدٸككە, دەنساۋلىق ساقتاۋ باسقارماسىنا حابارلاسۋ مٷمكٸن ەمەسٸن ايتادى.
ازاتتىق تٸلشٸسٸنە سۇقبات بەرگەن قالا تۇرعىنى ەرجان وڭعاربايدىڭ 67 جاستاعى ەپكەسٸ وسىدان ٷش كٷن بۇرىن پنەۆمونييادان قايتىس بولعان. مارقۇمنىڭ 36 جاستاعى بالاسى دا پۋلمونولوگييا بٶلٸمٸندە حال ٷستٸندە جاتىر.
- جيەنٸمنٸڭ جاعدايى اۋىر. دەرٸگەرلەرمەن سٶيلەسەيٸن دەسەم, تاڭ اتقالى جاۋاپ بەرەتٸن بٸر ادامعا جولىعا الماي تۇرمىن. جاعدايى مەنٸڭ جيەنٸمنەن گٶرٸ تەۋٸرلەۋ, سٶيلەي الاتىن ناۋقاستار دەرٸگەر دە, مەدبيكە دە جەتٸسپەيدٸ دەيدٸ. بۇلاي بولمايدى عوي! قينالىپ جاتقان ادامداردى دەرٸگەرلەر ەمدەۋٸ كەرەك ەمەس پە? - دەيدٸ ەرجان وڭعارباي.
اقتٶبە وبلىستىق دەنساۋلىق ساقتاۋ باسقارماسىنىڭ دەرەگٸنشە, پنەۆمونييامەن اۋرۋحاناعا تٷسكەن پاتسيەنتتەردەن COVID-19 تابىلماعان. بٸراق ەكٸ اۋرۋدىڭ بەلگٸلەرٸ ٶتە ۇقساس. بۇرىن-سوڭدى مۇنداي جاعدايمەن كەزدەسپەگەن دەرٸگەرلەر جاپپاي پنەۆمونييانىڭ COVID-پەن بايلانىسى بار-جوعىن ايتا الماي وتىر.
19 ماۋسىم كٷنگٸ مەلٸمەت بويىنشا, اقتٶبە وبلىسىندا بارلىعى 853 ادامنان كوروناۆيرۋس تابىلعان: 588 ادامدا اۋرۋ بەلگٸلەرٸ بار, 265 ادامنان COVID-19 بەلگٸسٸ بايقالماعان. رەسمي مەلٸمەت بويىنشا, كوروناۆيرۋستان بٸر ادام قايتىس بولعان. بۇعان دەيٸن اقتٶبە وبلىسىندا كوروناۆيرۋس جۇقتىرعان ٷش ادامنىڭ قايتىس بولعانى حابارلانعان. بٸراق كەيٸنٸرەك ٶلٸم-جٸتٸمدٸ زەرتتەۋ كوميسسيياسى ولاردىڭ "كوروناۆيرۋستان قايتىس بولماعانىن" ايتقان.
جاڭاگٷل جٷرسٸن, ازاتتىق
