Foto:elements.envato.com
Aqtóbe oblysynda Keńqiiaq jáne Shubarshi aýyldary mańynda munai aralas sý tógildi. Aqparatty Ekologiia, geologiia jáne tabiǵi resýrstar ministrliginiń baspasóz qyzmeti rastady, - dep habarlaidy Tengrinews.kz agenttigi.
Ministrlik málimetinshe, "Keńqiiaqmunai" kenishindegi №797 uńǵymada suiyqtyqtyń aǵýy týraly habar 30 qazanda túsken.
"Fakt boiynsha departament inspektory aralaý júrgizip, onda 29 qazanda saǵat 22:30 shamasynda uńǵymada negizgi oqpannyń dánekerlengen jeri úzilgeni anyqtaldy. Lastanǵan aýmaqtyń kólemi úsh myń sharshy metr. Apat saldaryn joiýmen "Aqberen" JShS ainalysyp jatyr", - dedi ministrlik.
Resmi derekterge sáikes, apat ornynda №797 uńǵymasynan munai aralas lastanǵan sý aǵyp jatyr.
"Inspektor oqiǵa ornynan aýmaqty ólshep, synamalar aldy. Kásiporyn ókilderi qatysyp, akt jasaldy. Derek boiynsha departament jospardan tys tekseris taǵaiyndaidy", - dedi ministrlik ókilderi.
