video kadry
Aqtóbe oblysynda 14 jastaǵy oqýshynyń jumbaq ólimine qatysty ata-anasy jan-jaqty tekserý júrgizýdi talap etip otyr. Qara jamylǵan otbasy balalarynyń álimjettikten kóz jumǵanyn aitady, - dep habarlaidy Tengrinews.kz portaly KTK telearnasyna silteme jasap.
Shalqar aýdanyndaǵy Aishýaq aýylynda turatyn Rýslan Jalmuratov "Ulymdy ózinen eresekter uryp óltirdi" deidi.
Úsh kún buryn balasyn jerlegen áke 14 jastaǵy Rústemdi 11-synyptyń oqýshylary tepkilegenin aitady. Aýyr soqqydan bala sol jerde qaitys bolǵan.
Esinen tanyp, birden demi úzilgen oqýshyny sol jerdegiler medbikeniń úiine jetkizipti. Alaida tártip saqshylary marqumnyń denesinde uryp-soǵý belgileri joq dep málimdeme jasaǵan. Degenmen saraptama taǵaiyndalǵan. Al ata-anasy marqum ulyna álimjettik kórsetken aýyl balalarynyń jazalanǵanyn qalaidy.
"Meniń balamdy qatty tepken. Sol tepkiden tizerlep otyryp, keiin qulaǵan. Sol arada til tartpai ketken. Betine qar shashqan, qasyndaǵy balalary. Bolmaǵan soń, sol kóshedegi medbikeniń úiine kóterip aparǵan. Balamdy qasaqana óltirgenderge qatysty shara qoldanýdy suraimyn", - deidi marqumnyń ákesi Rýslan Jalmuratov.
Jasóspirimniń júregi aýyrǵany týraly aqparatty otbasy joqqa shyǵarady. Olar jigittiń densaýlyǵy jaqsy bolǵanyn aitady.
