Aqtóbe oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nursulý Berkimbaeva óńirdegi epidemiologiialyq jaǵdai týraly aitty, dep habarlaidy "Ult aqparat".
Sońǵy táýlikte Aqtóbe oblysynda 1 adamnan koronavirýs infektsiiasy anyqtaldy. 31 jastaǵy Aqtóbe turǵyny profilaktikalyq maqsatta tekserilgen. PTR-synamasy onyń virýs juqtyrǵanyn kórsetken. Búginge deiin óńirde barlyǵy 3 myńnan astam adam virýs juqtyrsa, olardyń 98 paiyzy jazylyp shyqty.
«Shekaralarda shekteý sharasy kúsheitildi. Aqtóbe oblysynda eki shekara beketi bar. Qarǵaly men Mártók arqyly 6-14 qazan aralyǵynda 3600-den astam adam ótti. Onyń ishinde anyqtama qujaty bolmaǵan 594 adamnan PTR-synama alynyp, ekeýiniń nátijesi oń bolyp shyqty. Olar oqshaýlanyp, em alýda. Kórsetkish keibir oblysta asyp ketip jatyr. Shekteý de kúsheitilgen. Aqtóbe oblysynda epidemiologiialyq jaǵdai turaqty. Eger buǵan deiingi qaýlyda bekitilgen talapty saqtap, sanitarlyq erejeni ustanatyn bolsaq, jańa qaýly qabyldanbaidy. Kórsetkishti saqtap qalý ózimizdiń qolymyzda. Betperde taǵyp, áleýmettik araqashyqtyqty saqtaý qajet», - dedi Nursulý Berkimbaeva.
Aita keteiik, oblysta karantin talaptarynyń saqtalýyn tekseretin monitoringilik toptar jumys isteidi. Barlyǵy 1 myńǵa jýyq hattama toltyrylyp, 82 million teńgeden astam aiyppul salyndy.
Eske salsaq, óńirde qajettilik týyndaǵan jaǵdaida tósek-oryn sany 315-ten 3603-ke deiin ulǵaitylmaq. 6 qazannan bastap A.Dosjanova jataqhanasy, Jaisań kópsalaly kolledji, Qarǵaly aýdanynyń Álimbet mektep-internatynan 440 oryndyq 3 statsionar iske qosyldy. Oblystaǵy 1547 tósek-orynnyń 1438-i, iaǵni, 93% ottegimen qamtylǵan.
