Foto: Pexels.com
Aqtóbe oblysynyń Mártók aýdandyq soty tórt jyl boiy aliment tólemegen ákege qatysty isti qarady. 2021 jyly sot burynǵy jubaiynyń paidasyna eki balany asyraý úshin onyń barlyq tabys túrleriniń úshten birin aliment retinde óndirý týraly sheshim shyǵarǵan. Alaida, balalardyń ákesi osy ýaqytqa deiin aliment tólemei, qaryzy 4 million teńgeden asyp ketken.
Sot sheshimin oryndaý barysynda er adamnyń resmi jumys istemeitini anyqtalyp, oǵan júrgizýshi kýáliginen aiyrý jáne elden shyǵýǵa shekteý qoiý sharalary qoldanyldy. 2024 jyly ol aliment tólemegeni úshin 5 táýlikke ákimshilik qamaýǵa alynǵan. Osy jaǵdaiǵa bailanysty balalardyń anasy nemerelerin asyraý úshin ájesinen aliment óndirip alýǵa sotqa júginýge májbúr bolǵan.
Ájesi sotta jalaqysynyń azdyǵyn, nesie tóleý mindettemeleri men densaýlyǵynyń nasharlyǵyn alǵa tartty. Sondai-aq ol asyraýyndaǵy ekinshi ulynyń otbasyn qamtamasyz etý shyǵyndaryn da atap ótti. Óz kezeginde balalardyń ákesi jumysqa ornalasqanyn jáne aliment tóleýge daiyn ekenin aityp, talapty qanaǵattandyrmaýdy surady.
Sot sheshimi boiynsha, áke óz mindettemelerin oryndamaǵan jaǵdaida onyń jaýapkershiligin ájege júkteý zańsyz dep tanyldy. Tek ata-anasy múgedek bolǵan nemese olar bolmaǵan jaǵdaida ǵana mundai mindetti ájege júkteýge negiz bar. Osyǵan bailanysty sot talapty qanaǵattandyrýdan bas tartty. Sot sheshimi zańdy kúshine engen joq.
