Aqtóbe oblysynda kiik atyp, múiizin satyp kelgen bir top adam ustaldy, dep habarlaidy "Ult aqparat".
«Aqtóbelik politseiler «Jedel izdestirý is-sharalaryn júrgizý barysynda politseiler Aqtóbe men Áiteke bi aýdany turǵyndarynyń kiikti zańsyz atý jáne satý ainalymyna qatysy bary týraly aqparat aldy. 10 tamyzda politseiler Qarabutaq kentinde kúdiktilermen satyp alýshylar retinde kezdesý uiymdastyrdy», - deidi oblystyq Politsiia departamenti bastyǵynyń orynbasary Qanat Nurmaǵambetov.
Onyń aitýynsha, arnaiy qabyldanǵan sharalar nátijesinde PD qyzmetkerleri buryn sotty bolǵan 4 adamdy ustady. Olardyń ekeýi Áiteke bi aýdanyndaǵy sharýa qojalyqtarynyń basshylary bolyp shyqty.
Kúdiktilerden jalpy salmaǵy 50 keli bolatyn 135 dana múiiz tárkilendi. Sonymen qatar, olardyń biriniń úiin tintý barysynda tirkelmegen myltyq tárkilenip, qoradan soiylǵan eki kiik pen jabaiy qaban tabyldy.
Brakonerler barlyǵy 70 bas kiikti atqan.
Oblystyq PD baspasóz qyzmetiniń habarlaýynsha, Qylmystyq kodekstiń «Ósimdikterdiń nemese janýarlardyń sirek kezdesetin jáne Quryp ketý qaýpi tóngen, sondai-aq paidalanýǵa tyiym salynǵan túrlerimen, olardyń bólikterimen nemese derivattarymen zańsyz is júrgizý» baby boiynsha sotqa deiingi tergeý bastaldy.
Aita keteiik, jyl basynan beri Aqtóbe oblysynda kiikti zańsyz atqan 2 fakti jáne múiizin satý boiynsha 8 derek tirkeldi.
