«Aqtóbe oblysynda «oramal daýyna» orai balalary mektepke barmai otyrǵan on ata-ananyń árqaisyna 12025 teńgeden aiyppul salyndy» dep habarlady Azattyqqa Aqtóbe oblysynyń bilim salasyndaǵy baqylaý departamentiniń direktory Janna Qaishyǵulova. Onyń sózinshe, aiyppul salý úshin taǵy eki ata-ananyń qujattary ázirlenip jatyr.
- On adamǵa bes ailyq eseptik kórsetkishke (AEK – red.) teń aiyppul salyndy. Olar Ákimshilik quqyq buzýshylyq kodeksiniń 409-babynyń 2-tarmaǵynda kórsetilgen («Ata-analardyń nemese ózge de zańdy ókilderdiń bilim berý zańnamasynda kózdelgen mindetterdi oryndamaýy nemese tiisinshe oryndamaýy») zańnamany buzdy dep aiyptalyp otyr. Ata-analar «iá, biz mektep formasyn buzǵanymyzdy moiyndaimyz, balany sabaqqa jiberemiz» degende eskertýmen shektelgen bolar edik. Biraq olar aitqandarynan qaitpai qoidy. Endi olar bir ai aralyǵynda aiyppuldy tóleýge mindetti. Endi bir jyl ishinde bul jaǵdai qaitalanar bolsa, ekinshi ret 20 AEK-ke teń (48100 tg) aiyppul salynady, – deidi Janna Qaishyǵulova.
Aqtóbe oblysynyń bilim salasyndaǵy baqylaý departamentiniń dereginshe, ákimshilik jaýapqa tartylǵan on ata-ananyń úsheýi Shalqar qalasynda turady. Shalqarlyq balalar oqý jylynyń ekinshi toqsanynan beri mektepke barmaǵan. Olardyń ata-analaryna aiyppul biyl 19 qańtar kúni salynyp, 30 qańtar kúni zańdy kúshine engen.
Shalqarlyqtardan keiin aiyppul salynǵan úsh ata-ana Qarǵaly aýdanynyń Petropavlovka aýylynda, tórteýi Hromtaý qalasynda turady. Bilim berý zańnamasynda kózdelgen mindetterdi oryndamady dep aiyptalyp, qujattary ázirlenip jatqan eki aqtóbeliktiń balalary oblys ortalyǵyndaǵy №52 jáne 55 mekteptiń oqýshylary.
Aqtóbe soty 1 aqpan kúni turǵyndardyń «oramal daýyna» qatysty №40 jáne 49 mektep direktorlarynyń ústinen túsirgen eki shaǵymy talabyn oryndaýdan bas tartqan. 2 aqpan kúni №23 mektepke qatysty shaǵym da qanaǵattandyrylmady. Qalalyq sottyń qaraýynda oramal daýyna qatysty áli úsh is bar.
Aqtóbe oblystyq din isteri departamentiniń dereginshe, oqý jylynyń úshinshi toqsany bastalǵaly oblysta oramal tartatyn kem degende 177 qyz bala mektepke bara almai otyr.
