Ótken jyly asa iri mólsherde para berýge itermelegeni úshin Aqtóbe oblysy ákiminiń burynǵy orynbasary Mamýnov eń uzaq merzimge – 12 jylǵa bas bostandyǵynan aiyryldy. Bul týraly AntikorNEWS alańynda QR Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Daniiar Bekaidarov aitty, dep habarlaidy "Ult aqparat".
2020 jyly para bergen jáne para berýge itermelegen 10 adam 10 jyldan astam ýaqytqa bas bostandyǵynan aiyrylǵan.
«Ótken jyly asa iri mólsherde para berýge itermelegeni úshin Aqtóbe oblysy ákiminiń burynǵy orynbasary Mamýnov eń uzaq merzimge – 12 jylǵa bas bostandyǵynan aiyryldy. Para bergeni úshin sottalǵandardyń 17%-dan astamy, iaǵni 111 memlekettik qyzmetshi bas bostandyǵynan aiyrylýdan basqa, memlekettik qyzmetten bosatylǵan jáne ómir boiy memlekettik qyzmette jumys isteý quqyǵynan aiyrylǵan», - deidi QR Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Daniiar Bekaidarov.
Taldaý kórsetkendei, kóp jaǵdaida para berýshiler jeke kompaniianyń ókili bolyp shyqqan.
«Olar laýazymdy tulǵalarǵa para berý arqyly kásipkerlik qyzmetin qolaily júzege asyrýǵa tyrysqan nemese memlekettik satyp alý sharttary boiynsha oryndalǵan jumystardyń aktilerine kedergisiz qol qoidyryp almaq bolǵan. Mysaly, Ermegiiaev («EKSPO-2017» UK) isi boiynsha para berýshi 7 jylǵa sottalsa, al olarǵa kómektesýshilerdiń 5 jáne 7 jylǵa bas bostandyǵy shektelgen. Sot aiyppul tóleý merzimin belgileidi jáne aiyppul tólenbegen jaǵdaida bas bostandyǵynan shekteý jazasy bas bostandyǵynan aiyrý jazasyna aýystyrylady», - deidi ol.
