Aqtóbe oblystyq tarihi-ólketaný mýzeii 2018 jyly jańa ǵimaratqa kóshti. Al ǵasyrlyq tarihy bar eski ǵimaratta birneshe jádiger qaraýsyz qalǵan, dep habarlaidy QazAqparat.
Aqtóbe oblystyq tarihi ólkentaný mýzeiiniń jádigeri 1929 jyly ótken ólke tarihy kórmesinen bastap jinaldy. Alǵashqy jyldary shaǵyn úide ornalassa, 1967 jyldyń 6 maýsymynda oblystyq tarihi-ólketaný mýzeiiniń ashylý saltanaty ótip, oǵan Qazaqstan Kompartiiasy Ortalyq komitetiniń birinshi hatshysy Dinmuhamed Ahmetuly Qonaev qatysqan.
Bul ǵimarattyń ǵasyrlyq tarihy bar. Qonaqúiden mýzeige ainalǵan nysan 2015 jylǵa deiin halyqqa qyzmet kórsetti. Al 2015 jyly avariialyq dep tanylyp, tek qyzmetkerleri kúndelikti jumysyn jalǵastyrdy. 2018 jyly qaladaǵy Batys-2 aýdanynda zamanaýi nysan qoldanysqa berilip, eskisi iesiz qaldy. Munda esigine qulyp salynǵanymen, kez kelgen turǵyn ońai buzyp kire alady. Ishinde Aqtóbe oblysynyń ǵana emes, elimizdiń belgili azamattarynyń portreti de jatyr. Sonymen birge shańyraq, besik, shai ústeli de bar. Tot basqan qarýdy da osy jerden tabýǵa bolady.
«Biz negizgi eksponattardy kóshirip aldyq. Al ózgesi esepten shyǵarylǵan. Qalǵan aýa baptaǵysh, vetrinalar arnaiy mekemeniń kómegimen joiylady. Ózge zattar týraly aitsam, mýzei qoryna kirmegen. Ol da qoqysqa laqtyrylmaidy, tek joiylýy tiis. Aldymen konkýrs jariialap, jeńimpaz anyqtalýy kerek. Negizi eki jyl boiy ǵimarat mýzeige tiesili boldy. Ol kezde eshkim esigin ashpady. Bos turǵan soń kúzet qyzmeti bolmady, degenmen múlikti búldirgen adamdy kórmedim. Al kitaphana balansyna ótken soń qaita-qaita ishine kirip, beinematerial taratyp júr», - dedi Aqtóbe oblystyq tarihi-ólketaný mýzeiiniń direktory Meiram Dúisenǵali.
Aqtóbe qalasy ákimdiginiń qaýlysymen Altynsarin kóshesindegi ólketaný murajaiynyń ǵimaraty biyl aqpan aiynda qalalyq ortalyqtandyrylǵan kitaphana júiesiniń balansyna berildi. Qazirgi kezde jobalyq-smetalyq qujat daiyndalyp, saraptamaǵa jiberildi.
«Saraptama qorytyndysy shyqqan soń bul ǵimaratqa kúrdeli jóndeý jumysy júrgizilip, qalalyq ortalyqtandyrylǵan kitaphana júiesine beriledi. Kovorking te bolady. Eksponattardyń barlyǵy oblystyq tarihi-ólketaný murajaiyna tiesili. Olar alyp ketti. Beisenbi, senbi kúnderi jan-jaǵyndaǵy qoqysty jinaimyz, ishinde emes. Kúnde ashyq turǵan joq. Biz qulyp satyp qoidyq», - Aqtóbe qalalyq mádeniet jáne tilderdi damytý bóliminiń basshysy Ásel Bólekova.
