اقتٶبە وبلىستىق تاريحي-ٶلكەتانۋ مۋزەيٸ 2018 جىلى جاڭا عيماراتقا كٶشتٸ. ال عاسىرلىق تاريحى بار ەسكٸ عيماراتتا بٸرنەشە جەدٸگەر قاراۋسىز قالعان, دەپ حابارلايدى قازاقپارات.
اقتٶبە وبلىستىق تاريحي ٶلكەنتانۋ مۋزەيٸنٸڭ جەدٸگەرٸ 1929 جىلى ٶتكەن ٶلكە تاريحى كٶرمەسٸنەن باستاپ جينالدى. العاشقى جىلدارى شاعىن ٷيدە ورنالاسسا, 1967 جىلدىڭ 6 ماۋسىمىندا وبلىستىق تاريحي-ٶلكەتانۋ مۋزەيٸنٸڭ اشىلۋ سالتاناتى ٶتٸپ, وعان قازاقستان كومپارتيياسى ورتالىق كوميتەتٸنٸڭ بٸرٸنشٸ حاتشىسى دٸنمۇحامەد احمەتۇلى قوناەۆ قاتىسقان.
بۇل عيماراتتىڭ عاسىرلىق تاريحى بار. قوناقٷيدەن مۋزەيگە اينالعان نىسان 2015 جىلعا دەيٸن حالىققا قىزمەت كٶرسەتتٸ. ال 2015 جىلى اۆارييالىق دەپ تانىلىپ, تەك قىزمەتكەرلەرٸ كٷندەلٸكتٸ جۇمىسىن جالعاستىردى. 2018 جىلى قالاداعى باتىس-2 اۋدانىندا زاماناۋي نىسان قولدانىسقا بەرٸلٸپ, ەسكٸسٸ يەسٸز قالدى. مۇندا ەسٸگٸنە قۇلىپ سالىنعانىمەن, كەز كەلگەن تۇرعىن وڭاي بۇزىپ كٸرە الادى. ٸشٸندە اقتٶبە وبلىسىنىڭ عانا ەمەس, ەلٸمٸزدٸڭ بەلگٸلٸ ازاماتتارىنىڭ پورترەتٸ دە جاتىر. سونىمەن بٸرگە شاڭىراق, بەسٸك, شاي ٷستەلٸ دە بار. توت باسقان قارۋدى دا وسى جەردەن تابۋعا بولادى.
«بٸز نەگٸزگٸ ەكسپوناتتاردى كٶشٸرٸپ الدىق. ال ٶزگەسٸ ەسەپتەن شىعارىلعان. قالعان اۋا باپتاعىش, ۆەترينالار ارنايى مەكەمەنٸڭ كٶمەگٸمەن جويىلادى. ٶزگە زاتتار تۋرالى ايتسام, مۋزەي قورىنا كٸرمەگەن. ول دا قوقىسقا لاقتىرىلمايدى, تەك جويىلۋى تيٸس. الدىمەن كونكۋرس جارييالاپ, جەڭٸمپاز انىقتالۋى كەرەك. نەگٸزٸ ەكٸ جىل بويى عيمارات مۋزەيگە تيەسٸلٸ بولدى. ول كەزدە ەشكٸم ەسٸگٸن اشپادى. بوس تۇرعان سوڭ كٷزەت قىزمەتٸ بولمادى, دەگەنمەن مٷلٸكتٸ بٷلدٸرگەن ادامدى كٶرمەدٸم. ال كٸتاپحانا بالانسىنا ٶتكەن سوڭ قايتا-قايتا ٸشٸنە كٸرٸپ, بەينەماتەريال تاراتىپ جٷر», - دەدٸ اقتٶبە وبلىستىق تاريحي-ٶلكەتانۋ مۋزەيٸنٸڭ ديرەكتورى مەيرام دٷيسەنعالي.
اقتٶبە قالاسى ەكٸمدٸگٸنٸڭ قاۋلىسىمەن التىنسارين كٶشەسٸندەگٸ ٶلكەتانۋ مۇراجايىنىڭ عيماراتى بيىل اقپان ايىندا قالالىق ورتالىقتاندىرىلعان كٸتاپحانا جٷيەسٸنٸڭ بالانسىنا بەرٸلدٸ. قازٸرگٸ كەزدە جوبالىق-سمەتالىق قۇجات دايىندالىپ, ساراپتاماعا جٸبەرٸلدٸ.
«ساراپتاما قورىتىندىسى شىققان سوڭ بۇل عيماراتقا كٷردەلٸ جٶندەۋ جۇمىسى جٷرگٸزٸلٸپ, قالالىق ورتالىقتاندىرىلعان كٸتاپحانا جٷيەسٸنە بەرٸلەدٸ. كوۆوركينگ تە بولادى. ەكسپوناتتاردىڭ بارلىعى وبلىستىق تاريحي-ٶلكەتانۋ مۇراجايىنا تيەسٸلٸ. ولار الىپ كەتتٸ. بەيسەنبٸ, سەنبٸ كٷندەرٸ جان-جاعىنداعى قوقىستى جينايمىز, ٸشٸندە ەمەس. كٷندە اشىق تۇرعان جوق. بٸز قۇلىپ ساتىپ قويدىق», - اقتٶبە قالالىق مەدەنيەت جەنە تٸلدەردٸ دامىتۋ بٶلٸمٸنٸڭ باسشىسى ەسەل بٶلەكوۆا.
