Elimizde otbasy, neke máselelerine qatysty azamattyq isterdiń ósip ketkenine alańdaýshylyq bar ekenin jasyra almaimyz. Jastardyń bas quraýy da, shańyraq tigip, úi bolyp ketýi de úlken problemalardyń qatarynda. Bul taqyrypqa Elbasy Nursultan Nazarbaev ta ainalyp soǵyp, otbasylarǵa qamqorlyq tanytýdy, demografiialyq ahýaldy, ana men balany qoldaýdy tapsyryp keledi. Byltyr QR Joǵarǵy Soty «Otbasylyq sot» atty qanatqaqty jobasyn da iske qosqan.
Osy jobany júzege asyrý aiasynda Aqtóbe qalasy ákimdiginiń qoldaýymen jáne qalalyq sottyń bastamasymen «Otbasyn saqtaý ortalyǵy» ashyldy. “Anaǵa taǵzym» ǵimaratyndaǵy jańa nysan erli-zaiyptylar arasyndaǵy daýlardy retteýge, otbasylyq qatynastardy saýyqtyrýǵa, kámeletke tolmaǵan balalardyń múddelerin qorǵaýǵa yqpal etedi.
«Bul ortalyq memlekettik otbasy saiasatyn damytýdy, qazaq shańyraǵyndaǵy qundylyqtardy nasihattaýdy jáne jarasa almai júrgen erli-zaiyptylarǵa psihologiialyq kómek kórsetýdi maqsat etedi. Rýhani-adamgershilik tárbieni túsindirý de bir mindetimiz. Jańa mekeme otbasyn saqtaýǵa, eń bastysy kámeletke tolmaǵan balalardyń quqyqtaryn qorǵaýǵa jáne ata-anasynyń qasynda bolýǵa múmkindik týǵyzady degen oidamyz», deidi jergilikti ákimdiktiń ókilderi.
Aita keteiik, byltyrǵy 4 aida nekeni buzý týraly 1 002 talap aryz túsip, onyń 4420-sine sheshim shyǵarylsa, 254 is tatýlasýǵa bailanysty toqtatylǵan. Al biylǵy osy kezeńde 1 264 talap aryz túsip, 403-ne sheshim shyǵarylypty. Al 518 is erli-zaiyptylardyń til tabysýymen aiaqtalǵan. Bul derekter otbasyn saqtaý ortalyǵynyń jumysyn jandandyrý qajettigin ańǵartady.
