«Aqtóbe» FK burynǵy bas direktory Dmitrii Vasilev pen oblystyq dene shynyqtyrý jáne sport basqarmasynyń burynǵy basshysy Eskendirbek Mahanovqa sot úkim shyǵardy, dep habarlaidy QazAqparat tilshisi.
Dmitrii Vasilevtiń jeke múlki tárkilenip, 8 jylǵa bas bostandyǵynan aiyrý jazasy taǵaiyndaldy. Al Eskendirbek Mahanovtyń da jeke múlki tárkilenip, 7 jyl taǵaiyndaldy, endi oǵan temir tordyń ar jaǵynda 6 jyl 6 aiyn ótkizý qaldy. 240 million teńge shyǵyndy sottalýshylar birlesip óteidi.
Sonymen qatar Vasilev 43 million 836 myń teńgeden astam, al Mahanov 1 million 94 myń 312 teńge kóleminde materialdyq shyǵyndy óteidi. «Aqtóbe» fýtbol klýbynyń bas direktory qyzmetin atqarǵan Dmitrii Vasilev 2016 jyldyń 8 qarashasy kúni Qylmystyq kodekstiń «Senip tapsyrylǵan bóten múlikti iemdenip alý nemese talan-tarajǵa salý» baby boiynsha qamaýǵa alynǵan bolatyn. Al basty sot otyrysy sáýirde bastaldy. Dmitrii Vasilev aqshany talan-tarajǵa salmaǵanyn, únemdegenin aityp, aqtaldy. Degenmen memlekettik aiyptaýshy Vasilevtiń aiyna 4 million teńge jalaqy alyp otyrǵanyn, ózine negizsiz syiaqy taǵaiyndaǵanyn aiyptaý qorytyndysynda tizbektep berdi. «Bas direktordyń ailyǵy 4 million teńge bolǵan. Sóitip, 2015 jyldyń jeltoqsanynan 2016 jyldyń qazanyna deiin Vasilevke 40 million 315 myń teńge aýdarylǵan. Shyǵyn - 36 million 500 myń teńge. Sonymen qatar, 2016 jyly shilde aiynda taǵy 10 million 980 myń teńge syiaqy bergen», - dedi sot otyrysynda memlekettik aiyptaýshy Elýbek Talasov. Aiyptaý qorytyndysy kezinde oblystyq dene shynyqtyrý ján sport basqarmasynyń burynǵy basshysy Eskendirbek Mahanovtyń «Aqtóbe»-«Býdapesht», «Aqtóbe»-«Atyraý» oiyndaryn qaraýǵa baryp, jol shyǵyny men jatyn ornynyń aqshasy klýbtyń qarjysynan jumsalǵany belgili boldy.
Sot úkimi zańdy kúshine engen joq.
