«اقتٶبە» فك بۇرىنعى باس ديرەكتورى دميتريي ۆاسيلەۆ پەن وبلىستىق دەنە شىنىقتىرۋ جەنە سپورت باسقارماسىنىڭ بۇرىنعى باسشىسى ەسكەندٸربەك ماحانوۆقا سوت ٷكٸم شىعاردى, دەپ حابارلايدى قازاقپارات تٸلشٸسٸ.
دميتريي ۆاسيلەۆتٸڭ جەكە مٷلكٸ تەركٸلەنٸپ, 8 جىلعا باس بوستاندىعىنان ايىرۋ جازاسى تاعايىندالدى. ال ەسكەندٸربەك ماحانوۆتىڭ دا جەكە مٷلكٸ تەركٸلەنٸپ, 7 جىل تاعايىندالدى, ەندٸ وعان تەمٸر توردىڭ ار جاعىندا 6 جىل 6 ايىن ٶتكٸزۋ قالدى. 240 ميلليون تەڭگە شىعىندى سوتتالۋشىلار بٸرلەسٸپ ٶتەيدٸ.
سونىمەن قاتار ۆاسيلەۆ 43 ميلليون 836 مىڭ تەڭگەدەن استام, ال ماحانوۆ 1 ميلليون 94 مىڭ 312 تەڭگە كٶلەمٸندە ماتەريالدىق شىعىندى ٶتەيدٸ. «اقتٶبە» فۋتبول كلۋبىنىڭ باس ديرەكتورى قىزمەتٸن اتقارعان دميتريي ۆاسيلەۆ 2016 جىلدىڭ 8 قاراشاسى كٷنٸ قىلمىستىق كودەكستٸڭ «سەنٸپ تاپسىرىلعان بٶتەن مٷلٸكتٸ يەمدەنٸپ الۋ نەمەسە تالان-تاراجعا سالۋ» بابى بويىنشا قاماۋعا الىنعان بولاتىن. ال باستى سوت وتىرىسى سەۋٸردە باستالدى. دميتريي ۆاسيلەۆ اقشانى تالان-تاراجعا سالماعانىن, ٷنەمدەگەنٸن ايتىپ, اقتالدى. دەگەنمەن مەملەكەتتٸك ايىپتاۋشى ۆاسيلەۆتٸڭ ايىنا 4 ميلليون تەڭگە جالاقى الىپ وتىرعانىن, ٶزٸنە نەگٸزسٸز سىياقى تاعايىنداعانىن ايىپتاۋ قورىتىندىسىندا تٸزبەكتەپ بەردٸ. «باس ديرەكتوردىڭ ايلىعى 4 ميلليون تەڭگە بولعان. سٶيتٸپ, 2015 جىلدىڭ جەلتوقسانىنان 2016 جىلدىڭ قازانىنا دەيٸن ۆاسيلەۆكە 40 ميلليون 315 مىڭ تەڭگە اۋدارىلعان. شىعىن - 36 ميلليون 500 مىڭ تەڭگە. سونىمەن قاتار, 2016 جىلى شٸلدە ايىندا تاعى 10 ميلليون 980 مىڭ تەڭگە سىياقى بەرگەن», - دەدٸ سوت وتىرىسىندا مەملەكەتتٸك ايىپتاۋشى ەلۋبەك تالاسوۆ. ايىپتاۋ قورىتىندىسى كەزٸندە وبلىستىق دەنە شىنىقتىرۋ جەن سپورت باسقارماسىنىڭ بۇرىنعى باسشىسى ەسكەندٸربەك ماحانوۆتىڭ «اقتٶبە»-«بۋداپەشت», «اقتٶبە»-«اتىراۋ» ويىندارىن قاراۋعا بارىپ, جول شىعىنى مەن جاتىن ورنىنىڭ اقشاسى كلۋبتىڭ قارجىسىنان جۇمسالعانى بەلگٸلٸ بولدى.
سوت ٷكٸمٸ زاڭدى كٷشٸنە ەنگەن جوق.
