Foto: Úkimet
Astana qalasynda Q. Muńaitpasov atyndaǵy eski stadionnyń ornyna jańa sport nysany salynady. Jobaǵa Arnaýly memlekettik qordan 17,3 milliard teńge qarajat bólingen. Bul týraly Ult.kz habarlaidy.
1936 jyly salynǵan Q. Muńaitpasov atyndaǵy ortalyq stadion ýaqyt óte jaramsyz bolyp, tolyǵymen bólshekteldi. Jańa stadionnyń qurylysy 2025 jyldyń sońyna deiin aiaqtalýy josparlanǵan.
Jańa stadionnyń syiymdylyǵy 3 598 orynǵa eseptelgen, onyń ishinde múmkindigi shekteýli azamattarǵa arnalǵan arnaiy oryndar da qarastyrylǵan. Nysan UEFA halyqaralyq standarttaryna sai salynatyn bolady. Qurylys aiaqtalǵannan keiin stadiondy Astana qalasy ákimdiginiń №8 olimpiadalyq rezervtegi mamandandyrylǵan balalar-jasóspirimder sport mektebiniń balansyna berý kózdelgen.
Sportshylar úshin zamanaýi jaǵdai jasalady
Jańa stadion oqý-jattyǵý jiyndaryn ótkizýge arnalǵan jáne sportshylardy daiyndaýǵa qolaily jaǵdai týǵyzbaq. Nysannyń iske qosylýy sporttyq úderisti jaqsartyp qana qoimai, jasóspirimder men kásibi sportshylardyń joǵary nátijeler kórsetýine múmkindik beredi.
Memlekettik qordyń áleýmettik jobalarǵa úlesi
Arnaýly memlekettik qordan bólingen qarjy tek stadion qurylysyna ǵana emes, basqa da mańyzdy áleýmettik jobalarǵa baǵyttalǵan. Máselen, elimizdiń ártúrli óńirlerinde jalpy somasy 82 milliard teńgeden asatyn qarjyǵa 16 nysan salynyp jatyr. Olardyń ishinde:
- 7 mektep (1 mýzykalyq mektepti qosqanda),
- 2 sport kesheni,
- kópsalaly aýrýhana,
- oblystyq jedel járdem stansasy,
- arnaiy áleýmettik qyzmet kórsetý ortalyǵy,
- jataqhana jáne 2 balabaqsha.
Sonymen qatar, Qyzylorda oblysynyń Aral aýdanynda sýmen jabdyqtaý júielerin salý jáne jańǵyrtý jumystary júrgizilýde.
Áleýmettik infraqurylym damýynyń mańyzy
Osyndai jobalardyń júzege asyrylýy eldegi áleýmettik infraqurylymnyń damýyna aitarlyqtai úles qosady. Jańa stadionnyń salynýy – elorda turǵyndary men sportsúier qaýym úshin qýanyshty jańalyq. Sporttyq nysan eldiń sport salasyndaǵy damýyna jańa serpin berip, jas talanttardy tárbieleýge jaǵdai jasaidy.
