Aqtaýlyqtar 7-shaǵynaýdandaǵy eski oiyn alańynyń ornyna meditsinalyq ortalyq salýǵa qarsy, dep habarlaidy "Ult aqparat".
Al, jeke kásipker keńes ókimetinen qalǵan eski temir-tersektiń ornyna basqa jerden, biraq, úilerdiń qasynan jańa balalar oiyn alańy men eresekterge arnalǵan jańa jattyǵý ornyn ashyp bermek.
Burynǵy orynnan jańa meditsinalyq ortalyqtyń bir bóligin ashýdy josparlap otyr.
Shý shyqqan oiyn alańy 7-shaǵynaýdannyń 28,29,30 úileriniń janynda tur. Ótken aptada tozyǵy jetip turǵan alańdy súrip tastaǵan. Muny kórgen kópshilik shý ete qalypty.
«Oiyn alańy bizge qajet. Jan-jaǵymyz kólik joly, balalardyń oinaýyna oryn kerek. Bul jerde balalar 9-dan keshki 7-ge deiin júredi», - deidi turǵyndar.
Balalar alańyna jaqyn ornalasqan №28/1-shi ǵimarat jeke menshikte. Nysan iesi sharýashylyǵyn keńeitý úshin kólemi 300-350 sharshy metr jer qajettigin aitady.
Ol óz qarjysyna eski oiyn alańynyń ornyna jańa 2 alań salyp beremin dep otyr. Ol úshin isker áiel aldymen ýádesin oryndap, sodan soń ǵana meditsinalyq ortalyqtyń qurylysyn júrgize alady.
«Pandemiia kezinde meditsinalyq qural-jabdyqtyń jetispeýshiligi sezilgeni ras. Qazirgi tańda Aqtaýǵa sońǵy úlgidegi zamanýi quraldardy ákelemiz. Ol úshin myna jer qajet. Onyń ornyna 30-shy úidiń janyndaǵy bos turǵan aýmaqqa balalarǵa jáne eresekterge arnalǵan eki oiyn alańyn salyp berýge daiynmyn. Qazir turǵyndardyń kelisimin alyp júrmiz. Al, burynǵy oiyn alańynyń súrilýine bizdiń qatysymyz joq», -deidi jeke kásipker Alýash Kenjebaeva.
Sońǵy úlgidegi bir oiyn alańyn salýǵa keminde 4 mln teńge qajet. Qazirgi ýaqytta 68 turǵyn usynysyn qoldap, qaǵazǵa qol qoiypty.
Qalyp turǵan daýysty túgel jinaǵan jaǵdaida birden qala ákimdigine júginip, óz jobasyn usyna alady.
«Atalǵan jer ýchaskesi qazirgi tańda memleket menshigine rásimdelgen. Iaǵni, jeke nemese zańdy tulǵaǵa rásimdelmegen. Sonymen qatar, álgi jer teliminde qandai da bir qurylys júrgizýge qatysty kásipkerden ákimdikke jazbasha ótinishtiń kelip túspegenin habarlaimyn», - deidi Mańǵystaý oblysy jer qatynastary, sáýlet jáne qala qurylysy bóliminiń bas mamany Erkebulan Ǵabdolov.
Qazir balalar oiyn alańy turǵan jer ýchaskesi memleket menshiginde.
Apta basynda turǵyn úi-kommýnaldyq sharýashylyq bóliminiń tapsyrysymen mundaǵy qural-jabdyq alynyp tastalǵan.
Bul orynda memlekettik baǵdarlama aiasynda jańa oiyn alańy salynatyny da aityldy.
Oǵan qarjy bólingenge deiin kásipker turǵyndardyń kelisimin alyp, ákimdikke barsa, jaǵdai ózgerýi de múmkin.
