Búgin Aqtaýda kásibi boks keshi ótedi. Onyń aiasynda qazaqstandyq Bekzad Nurdáýletov (2-0, 1KO) profidegi úshinshi jekpe-jegin ótkizedi, dep habarlaidy QazAqparat Qazaqstannyń kásibi boksy paraqshasyna silteme jasap.
Nurdáýletov ózbekstandyq Farrýh Djýraevpen (6-4-1, 2KO) judyryqtasady. Jartylai aýyr salmaqtaǵy kezdesý segiz raýndqa eseptelgen.
Sondai-aq osy boks keshinde orta salmaqtaǵy Meiirim Nursultanov (14-0, 8KO) pen belarýs Dmitrii Atrohov (16-11, 7KO) kúsh synasady. Budan bólek, birqatar qazaqstandyq boksshy alǵash ret kásibi ringke shyǵady.
Barlyq boksshylar salmaq ólsheý rásimine qatysyp, belgilengen limitten asqan joq. Keshti uiymdastyrýshy – Adal Promotions kompaniiasy. Kesh búgin saǵat 19.00-de bastalady jáne tikelei efirden kórsetiledi.
