بٷگٸن اقتاۋدا كەسٸبي بوكس كەشٸ ٶتەدٸ. ونىڭ اياسىندا قازاقستاندىق بەكزاد نۇردەۋلەتوۆ (2-0, 1كو) پروفيدەگٸ ٷشٸنشٸ جەكپە-جەگٸن ٶتكٸزەدٸ, دەپ حابارلايدى قازاقپارات قازاقستاننىڭ كەسٸبي بوكسى پاراقشاسىنا سٸلتەمە جاساپ.
نۇردەۋلەتوۆ ٶزبەكستاندىق فاررۋح دجۋراەۆپەن (6-4-1, 2كو) جۇدىرىقتاسادى. جارتىلاي اۋىر سالماقتاعى كەزدەسۋ سەگٸز راۋندقا ەسەپتەلگەن.
سونداي-اق وسى بوكس كەشٸندە ورتا سالماقتاعى مەيٸرٸم نۇرسۇلتانوۆ (14-0, 8كو) پەن بەلارۋس دميتريي اتروحوۆ (16-11, 7كو) كٷش سىناسادى. بۇدان بٶلەك, بٸرقاتار قازاقستاندىق بوكسشى العاش رەت كەسٸبي رينگكە شىعادى.
بارلىق بوكسشىلار سالماق ٶلشەۋ رەسٸمٸنە قاتىسىپ, بەلگٸلەنگەن ليميتتەن اسقان جوق. كەشتٸ ۇيىمداستىرۋشى – Adal Promotions كومپانيياسى. كەش بٷگٸن ساعات 19.00-دە باستالادى جەنە تٸكەلەي ەفيردەن كٶرسەتٸلەدٸ.
