Aqtaý turǵyny nemere aǵasynyń máiiti zańsyz eksgýmatsiialanǵanyn aitty. Onyń sózinshe, salttyq qyzmet kórsetetin agenttik qyzmetkeri marqum bolǵan aǵasynyń qabirin qazyp, denesin basqa ziratqa jerlegen. Endi Iýrii Konovalov kináliler jaýapkershilikten qutylyp ketedi dep qorqyp otyr.
Bul týraly jergilikti "Lada" basylymy jazdy, dep habarlaidy Sputnik agenttigi.
Keleńsiz jaǵdai 2020 jyldyń 15 shildesinde bolǵan. Sol kúni Iýrii Konovalov nemere aǵasy Oleg Romanovty onyń anasy Tamara Romanovanyń beiitiniń janyna jerlegen.
"Nemere aǵamnyń qaitys bolǵanyn onyń otbasyna, Bakýde turatyn uldarǵa habarladym. Olardan jerleý quqyǵy týraly notariýs rastaǵan qujat alǵannan keiin jerleýdi uiymdastyra bastadym. Marqumdy jerleý úshin eki qalalyq agenttikke júgindim. Sol aralyqta Máskeýde turatyn ápkem Irina Hasanova nemere aǵam úshin jerleý ornyn qaladan tys jerde ornalasqan jańa ziratta daiyndap qoiǵanyn bildim. Árine, men buǵan kelispedim, sebebi uly qalalyq zirattaǵy anasynyń janynda jerlenýi kerek", - deidi ol.
Aitýynsha, ózi ápkesimen jeti jyldan beri aralaspaidy. Al onyń nemere aǵasyna arnap zirat daiyndaǵany aqtaýlyqty tańǵaldyrǵan. Sodan keiin qabir qazý boiynsha brigada jaldaǵan.
"Máiithanada marqumnyń jerleýge resmi qujat alǵannan keiin, sol brigadamen birge ziratqa keldim. Osylaisha 2020 jyldyń 15 shildesinde jerledik. Sodan úsh saǵat ótken soń zirat direktory maǵan habarlasyp, aǵamnyń qabiri qaita qazylǵanyn aitty. Osy jerge kelgen soń jerleý ornyna tóselgen tas joq ekenin, al qabir ústi qumǵa tolǵanyn kórdim. Sol jerden ketpei turǵanymda zirat qyzmetkeri ne bolǵanyn aitty. Ol jerleý agenttiginiń qyzmetkerleri marqumnyń denesin alyp, zirattan tys jerge shyǵarǵanyn jetkizdi", - deidi Iýrii Konovalov.
Er adam birden Aqtaý prokýratýrasyna aryz jazǵan. Máiitti zańsyz eksgýmatsiialaý faktisi boiynsha qylmystyq kodeksiniń 314-babynyń 1-bóligi ("ólgen adamnyń máiitin jáne olar jerlengen oryndaryn qorlaý") boiynsha qylmystyq is qozǵaldy. Sodan keiin qylmys deregi boiynsha qajetti tergeý júrgizilgen.
Konovalov tergeý barysynda salttyq qyzmet kórsetetin agenttik direktorynyń nusqaýy boiynsha Romanovtyń beiiti qazylyp, máiiti Aqtaý mańynda ornalasqan ziratqa qaita jerlengeni anyqtalǵanyn aitty.
"Meni shatastyrý maqsatynda aǵamdy birinshi jerlegen jerge agenttik direktorynyń nusqaýy boiynsha krest ornatylǵan. Osylaisha qaitys bolǵan adamnyń denesi osy jerde dep kórsetkisi kelgen. Salttyq qyzmet kórsetetin agenttik direktorynyń is-áreketteri eshqandai logika men moraldyq erejege sai emes. Onyń ne sebepti osylai istegenin áli kúnge deiin túsinbedim", - deidi ol.
Endi Iýrii Konovalov kúdiktiler jaýapkershilikten qutylyp ketedi dep qorqyp otyr.
"Sodan beri bir jyl ótti, is ornynan qozǵalǵan joq. Istiń sybailas jemqorlyqqa bailanysty toqtap turǵanyna senimdimin. Qylmysqa qatysy bar adamdar anyqtaldy, kýáger bar. Biraq is bir jyldan astam ýaqyt boiy sotqa tapsyrylmady. Tergeý bir ornynda tur, tipti isti japqysy keledi", - dep janaiqaiyn jetkizdi er adam.
Aitýynsha, osy ýaqytqa deiin ol birneshe ret prokýratýraǵa aryz jazǵan. Al Mańǵystaý oblysy prokýratýrasynyń baspasóz qyzmeti is boiynsha naqty aqparat alý úshin arnaiy suranyshat jiberý qajet ekenin jetkizdi.
