Foto: Freepik.com
Mańǵystaý oblysy Densaýlyq saqtaý basqarmasy ókili Aqtaýda qandala ýlaǵannan keiin zardap shekkenderdiń jaǵdaiy týraly aitty, - dep habarlaidy Tengrinews.kz saity Lada.kz portalyna silteme jasap.
Basqarma basshysynyń orynbasary Bibizada Dúisenbaevanyń aitýynsha, 21 qazanda 7 adam, onyń ishinde 2 bala ýlanǵan. 3 eresek Mańǵystaý oblystyq kópsalaly aýrýhanasyna jáne 2 bala balalar aýrýhanasyna jatqyzylǵan. Zardap shekkenderdiń biriniń jaǵdaiy qanaǵattanarlyq bolǵandyqtan, birinshi kúni úiine jiberilgen.
"Aýrýhanaǵa túsken kezde 2 eresek naýqastyń jaǵdaiy ortasha boldy. Taǵy bir zardap shekken er adamnyń jaǵdaiyn turaqtandyrý úshin jansaqtaý bólimine jatqyzyldy. Keshe tolyq tekseristen ótip, jaǵdaiy turaqtanǵanyna bailanysty bólimshege aýystyryldy. Búgin jaǵdaiy qanaǵattanarlyq bolǵandyqtan, naýqastyń ótinishi boiynsha úiine jiberildi.
Birinshi kúni bir jábirlenýshi birden úiine jiberildi, onyń jaǵdaiy da qanaǵattanarlyq boldy. Keiinirek balalarynyń jaǵdaiyna qatty alańdaǵan zardap shekken áiel de úiine jiberildi. Barlyǵy ambýlatoriialyq baqylaýda bolady", - dedi Bibizada Dúisenbaeva.
Zardap shekken balalardyń da jaǵdaiy aityldy.
"2 bala oblystyq balalar aýrýhanasyna jatqyzyldy. 2015 jyly týǵan qyzdyń jaǵdaiy ortasha aýyr boldy, birinshi kúni tekserildi, qazir dárigerlerdiń baqylaýynda. 2017 jyly týǵan bala tolyq tekserilip, jaǵdaiyn turaqtandyrý úshin jansaqtaýǵa jatqyzyldy. Keshe balanyń jaǵdaiy ortasha aýyrlyqtan ózgermedi. Búgin tańerteń balanyń jaǵdaiy jaqsardy, qazir ózi tamaqtana alady. Búgin jaǵdaiy qalypqa keldi. Sondyqtan jansaqtaýdan jalpy bólimshege aýystyryldy", - dedi Dúisenbaeva.
Eske salaiyq, qaiǵyly oqiǵa qalanyń №7 shaǵynaýdanynda bolǵan. Páterlerdiń biriniń iesi qandaladan qutylý úshin páterin ýlaǵan. Biraq ol mamandandyrylǵan qyzmetke júginbegen, saldarynan 2 bala qaitys boldy.
