«Aqtaý qalalyq liftileri» JShS shahtaǵa qulaǵan lifti jaiynda resmi pikir bildirdi, dep habarlaidy QazAqparat.
Esterińizge sala keteiik, oqys oqiǵa Aqtaýdaǵy 17 shaǵynaýdanda ornalasqan Aktau Plaza turǵyn úi kesheninde bolǵan.
Turǵyndardyń aitýynsha, 25 qyrkúiek kúni keshki saǵat 19:30 shamasynda ishinde adamdary bar lift shahtaǵa qulaǵan. Eshkim zardap shekken joq. Turǵyndar bir-birine kómektesip, shahtadan shyqqan.
Atalmysh oqiǵa kezinde liftide kishkentai balalar, jas analar bolǵan. Olar liftiniń isten shyǵýy birinshi ret emes dep shaǵymdandy.
«Aqtaý qalalyq liftileri» JShS quryltaishysy Kópbergen Jailiev málimetinshe turǵyn úidiń lifti turǵyndardyń ótinishi boiynsha barlyq erejelerge qaishy qosylǵan.
Ol qajetti synaqtardan ótpegen jáne paidalanýǵa berilmegen.
Túrik óndirisindegi liftini jetkizýge jáne montajdaýǵa arnalǵan shart 2019 jyly jasaldy. Liftini montajdaý jumysy 2020 jyly aiaqtaldy.
«Barlyq qujattardy qurylys salýshyǵa tapsyrdyq. Olar óz atynan paidalanýǵa berýge ótinish berýi kerek edi. Biraq bul qujattar úidi salýshylarda boldy. Olar úidi tolyq aiaqtamai jatyp adamdardy qonystandyrdy. Turǵyndar lift qosýdy surai bastady. Óitkeni altynshy, jetinshi qabattarda qart adamdar turady. Biz zańǵa qaishy keldik. Úidi tolyq paidalanýǵa ruqsat berilgenge deiin liftini iske qospaý kerek edi. Biz turǵyndarǵa jeńildik jasaǵanymyzǵa kinálimiz», - dedi «Aqtaý qalalyq liftileri» JShS quryltaishysy Kópbergen Jailiev.
Paidalanýǵa tapsyrar aldynda mamandar liftiniń qaýipsizdigin tekserýi kerek edi. Biraq bul jumystar jasalǵan joq. Óitkeni qurylys salýshy áli tirkeýge ótinish bermegen edi.
Mamandar tótenshe jaǵdaidyń sebebi shamadan tys júkteme bolýy múmkin dep boljaidy.
Videoda kóringendei, oqys oqiǵa kezinde liftiden alty eresek adam men jas balalar shyǵyp jatty.
