Aqtaýdaǵy mektepterdiń birinde oqýshylar taptalyp qala jazdady, dep habarlaidy Lada.kz portaly.
Ata-analardyń sózinshe, ekinshi aýysymda oqityn balalar ruqsatsyz ishke kire almai, dalada turýǵa májbúr bolǵan.
"Qyzym mektepke kirý múmkin emes ekenin aitatyn. Olar sabaq bastalǵanǵa 5 minýt qalǵanda ǵana mektepke kiretin kórinedi. Men jaǵdaidy óz kózimmen baryp kóreiin dedim. Shynynda da, barlyq oqýshy kirýge ruqsat etilmeiinshe syrtta turady eken. Sodan keiin júzdegen bala kabinetterine úlgerý úshin esik jaqta syǵylysyp, talasyp-tarmasyp kiredi. Vahtadan mán-jaidy bilgenimde bul direktordyń buiryǵy ekenin aitty", - dedi ata-ananyń biri.
Qalalyq bilim bólimi jaǵdai baqylaýǵa alynǵanyn aitady. Bul rette mektep ákimshiligi mundai jaǵdai kúnde qaitalanbaitynyn, tek bir ret bolǵanyn alǵa tartty.
"Saǵat 13:45-te mektepte jinalys ótti. Osyǵan bailanysty kezekshi muǵalim ýaqytynda astyna túse almady. Bul ýaqytta kireberiste ý-shý bastaldy. Mekteptegi 3 bloktyń árqaisysynda jeke kiretin esikter bar. Búgingi jaǵdai tek bir blokta boldy. Kún saiyn kezekshilik júrgiziledi", - dep habarlady Aqtaý qalalyq bilim bólimi.
Baspasóz qyzmeti mektepte mundai jaǵdai endi qaitalanbaidy dep otyr.
