اقتاۋدا مەكتەپ وقۋشىلارى تاپتالىپ قالا جازدادى

اقتاۋداعى مەكتەپتەردٸڭ بٸرٸندە وقۋشىلار تاپتالىپ قالا جازدادى, دەپ حابارلايدى Lada.kz پورتالى.

اتا-انالاردىڭ سٶزٸنشە, ەكٸنشٸ اۋىسىمدا وقيتىن بالالار رۇقساتسىز ٸشكە كٸرە الماي, دالادا تۇرۋعا مەجبٷر بولعان. 

"قىزىم مەكتەپكە كٸرۋ مٷمكٸن ەمەس ەكەنٸن ايتاتىن. ولار  ساباق باستالعانعا 5 مينۋت قالعاندا عانا مەكتەپكە كٸرەتٸن كٶرٸنەدٸ. مەن جاعدايدى ٶز كٶزٸممەن بارىپ كٶرەيٸن دەدٸم. شىنىندا دا, بارلىق وقۋشى كٸرۋگە رۇقسات ەتٸلمەيٸنشە سىرتتا تۇرادى ەكەن. سودان كەيٸن جٷزدەگەن بالا كابينەتتەرٸنە ٷلگەرۋ ٷشٸن ەسٸك جاقتا سىعىلىسىپ, تالاسىپ-تارماسىپ كٸرەدٸ. ۆاحتادان مەن-جايدى بٸلگەنٸمدە بۇل ديرەكتوردىڭ بۇيرىعى ەكەنٸن ايتتى", - دەدٸ اتا-انانىڭ بٸرٸ.

قالالىق بٸلٸم بٶلٸمٸ جاعداي باقىلاۋعا الىنعانىن ايتادى. بۇل رەتتە مەكتەپ ەكٸمشٸلٸگٸ مۇنداي جاعداي كٷندە قايتالانبايتىنىن, تەك بٸر رەت بولعانىن العا تارتتى. 

"ساعات 13:45-تە مەكتەپتە جينالىس ٶتتٸ. وسىعان بايلانىستى كەزەكشٸ مۇعالٸم ۋاقىتىندا استىنا تٷسە المادى. بۇل ۋاقىتتا كٸرەبەرٸستە ۋ-شۋ باستالدى. مەكتەپتەگٸ 3 بلوكتىڭ ەرقايسىسىندا جەكە كٸرەتٸن ەسٸكتەر بار. بٷگٸنگٸ جاعداي تەك بٸر بلوكتا بولدى. كٷن سايىن كەزەكشٸلٸك جٷرگٸزٸلەدٸ", - دەپ حابارلادى اقتاۋ قالالىق بٸلٸم بٶلٸمٸ.

باسپاسٶز قىزمەتٸ مەكتەپتە مۇنداي جاعداي ەندٸ قايتالانبايدى دەپ وتىر.