Aqtaý mektepteriniń birinde muǵalimder kabinet tapshylyǵyna bailanysty dálizde jumys isteýge májbúr. Mektep 1600 orynǵa eseptelgen, biraq onda úsh aýysymda 3,5 myńǵa jýyq bala oqidy, - dep habarlaidy Tengrinews.kz agenttigi "Habar 24" telearnasyna silteme jasap.
Telearna málimetinshe, muǵalimder mekteptiń birinshi qabatyndaǵy oryndy ózderi úshin jabdyqtaǵan. Óitkeni kabinet jetispeýine bailanysty muǵalimder kabinetin synyp retinde berýge týra kelgen.
"Qazir bizde muǵalimder kabineti joq. Dápterlerdi dálizde tekserýge týraly keledi. Árine, munyń bári qiyndyq týdyrady. Soǵan qaramastan óz jumysymyzdy jalǵastyramyz", - deidi 11-synyptyń jetekshisi Raýshan Ábilova.
Mekteptegi oqý bólmeleri úshin tipti sharýashylyq maqsattaǵy kabinetter de berilgen. Mysaly, qoima eńbek synybyna ainalǵan. Biraq tar, taqtasy joq, jylytýy álsiz.
"Bizde kórshi aýyldardyń balalary oqidy. Mysaly, Munaily aýdanynan keledi. Túpqaraǵan aýdany Telman jáne Aqshuqyr aýyldarynyń oqýshylary keledi. Bizge kórshi shaǵynaýdandardan 900-ge jýyq bala keledi. Júkteme úlken", - dep atap ótti mektep direktorynyń mindetin atqarýshy Orynbasar Naýryzbaev.
Oqý orny - búkil shaǵynaýdandaǵy jalǵyz mekeme. Kórshiles aýdandarda áli mektepter joq. Mańǵystaý oblysynda úsh aýysymda oqytatyn 18 mekeme bar eken.
"Úshinshi aýysymda bes myńnan asa bala oqidy. Búginde 20-dan asa mekteptiń qurylysy josparlanǵan. Tórt mekteptiń qurylysy júrgizilip jatyr. Bul Munaily aýdanyndaǵy mektepter jáne Aqtaý qalasyndaǵy árqaisy 1200 oryndyq eki mektep", - dedi oblystyq bilim basqarmasy basshysynyń orynbasary Gúlmira Mamaeva.
