Mańǵystaýlyq politseiler itbalyqty urǵandarǵa qatysty sotqa deiingi tergeýdi toqtatty, dep habarlaidy "Ult aqparat" Mańǵystaý oblysynyń politsiia departamentine silteme jasap.
Departament baspasóz qyzmetiniń málimetinshe, qylmystyń quramy bolmaýynan ókiletti organ osyndai sheshimge kelip otyr.
«Itbalyqty taiaqpen urǵandarǵa qatysty qozǵalǵan tergeý QR qylmystyq-protsessýaldyq Kodekstiń 35-shi babynyń 1-shi bólimine sáikes toqtatyldy. Teńiz janýaryna jábir kórsetkender keltirgen dáiek esepke alynyp, qylmys quramynyń bolmaýyna orai sotqa deiin júrgizilgen is jabyldy», - dedi Politsiia departamenti Ishki jáne syrtqy kommýnikatsiialar bólimi basshysynyń m.a. Áigerim Ibadýllaeva.
Esterińizge sala keteiik, ótken shilde aiynda Quryq eldi mekeninde jaǵalaýǵa jaqyn júzgen itbalyqqa birneshe adam tas laqtyryp, taiaqpen sabap tastaǵan edi. Teńiz janýaryn urǵandardyń arasynda balalar da boldy. Áýesqoi túsirilim kóp uzamai áleýmettik jelide jariialandy. Ony zerttegen tártip saqshylary tórt kúdiktini ustady. Olar ózine shabýyl jasaýy múmkin degen oimen itbalyqty teńizge qýyp tastaǵandaryn aityp aqtalǵan.
