Mańǵystaýda monitoring tobynyń ókilderi túngi klýbtyń esigin buzyp kirdi, dep habarlaidy "Ult aqparat".
Mańǵystaý oblysyndaǵy epidemiologiialyq jaǵdaidyń kúrt nasharlaýyna bailanysty 30 shilde men 2 tamyz aralyǵynda aimaqtaǵy monitoring toptary kúsheitilgen rejimde jumys istedi.
Túngi reid barysynda búginge deiin birneshe ret Mańǵystaý oblysynyń bas memlekettik sanitariialyq dárigeriniń qaýlysyn óreskel buzǵan «N2O» túngi klýby tekserildi.
Osy kúnge deiin atalǵan oryn tarapynan birneshe márte zań buzýshylyqtar oryn alǵan bolatyn.
Monitoring tobynyń múshesi Anar Shamshadinovanyń aitýynsha, osy klýbta kontserttyń ótetindigi jóninde afisha tarap, vatsap jelisi arqyly klýb ishindegi videolar kelgen.
Olar ǵimaratqa barǵan kezde dalada qatty mýzykanyń daýysy estilip turǵan.
Alaida, kúzetshiler monitoring top múshelerin ishke kirgizbei 3 saǵat dalada kútýge májbúr bolǵan.
«31 shilde kúni monitoring tobymen birge «N2O» túngi klýbyna bardyq. Sol kezde esigi tars jabyq turdy. Ishte qatty oinaǵan mýzykanyń daýysy estildi. Qolmen ustaǵanda esik dirildep, ishtegi jaidan habar berip turdy. Eń ókinishtisi, klýb qyzmetkerleri monitoring top múshelerin kóre tura, eshqandai jaýap bermei, elemeýi - uiat nárse. Eń sońynda quzyrly organ ókilderi kelip, qulypty buzýǵa týra keldi. Sebebi, monitoring top múshelerine ishte kóńil kóteretin sharalardyń ótip jatqany týraly habarlamalar kelip jatty. Alaida ishke kirgenimizde adamdardy kóre alamadyq. Olar biz syrtta turǵan ýaqyttyń ishinde adamdardy jasyryp, basqa esikter arqyly qashyryp jibergen. Biz «esikti nege ashpadyńyzdar?» dep suraǵanda «estimedik» dep jaýap berdi. Biz 5 minýt esik qaǵyp, ashpaǵannan keiin ǵana qulypty buzǵan joqpyz. 3 saǵat esik aldynda turǵannan keiin esikti buzýǵa týra keldi», - dedi Anar Shamshadinova.
Aita keteiik, monitoring toptary sońǵy 3 táýlikte oblys boiynsha 256 nysanǵa reid jasady.
Nátijesinde karantin talaptaryn saqtamaǵan 57 kásipkerge ákimshilik hattama toltyryldy.
Onyń ishinde 47 kásipkerlik nysan Aqtaý qalasynyń aýmaǵynda ornalasqan.
Aita keteiik, karantin talaptaryn buzǵandarǵa Ákimshilik quqyq buzý kodeksiniń 425 baby boiynsha jeke tulǵaǵa 40 AEK kóleminde aiyppul salý qarastyrylǵan.
