Indýstriia jáne infraqurylymdyq damý vitse-ministri Parlament Májilisinde keme qatynasy týraly kelisimdi ratifikatsiialaý jónindegi zań jobasyn tanystyrdy, dep habarlaidy QazAqparat.
«Atalǵan kelisim Eýraziialyq ekonomikalyq odaqqa qatysýshy memleketter arasynda jasaldy. Onyń erejeleri týraly aitar bolsam, birinshiden taraptardyń ishki sý joldary boiynsha kemelerdiń tranzittik ótýine ruqsat berý tártibin jeńildetý kózdeledi. Atap aitqanda, kelisimde tranzittik ótýge arnalǵan ótinimdi qaraý merzimi – 10 kún jáne ruqsatty ýákiletti organdar beretin bolyp belgilendi. Kelisimge qatysýshy elderdiń ishinde kemelerdiń tranzittik júzýi tek Reseidiń ishki sý joldarymen júzege asyrylady. Qazirgi kezde tranzittik ótýge ruqsatty Resei Federatsiiasynyń Úkimeti beredi. Osy ruqsatty alý 3 aidan 6 aiǵa deiingi merzimdi qamtidy», - dedi Berik Qamaliev.
Onyń aitýynsha, negizinen júkter Qara teńiz porttarynan qazaqstandyq porttarǵa (Aqtaý, Quryq, Baýtino, Atyraý) Volgo-Don kanaly arqyly jetkiziledi.
«Reseidiń ishki sý joldary arqyly tek qazaqstandyq kompaniialardyń jeńildetilgen tártippen ótý múmkindigi bar. Sol sebepti qazirgi ýaqytta Eýraziialyq odaqqa múshe emes Kaspii mańy elderi (Ázerbaijan, Iran, Túrikmenstan) Kaspii porttarynan Qara teńiz porttaryna júkterdi tasymaldaý úshin qazaqstandyq tasymaldaýshylardy («Qazaqteńizkólikfloty», «OMS shipping») tartýǵa daiyn eken bildirýde. Bizdiń Aqtaý jáne Quryq porttarynyń Transkaspii halyqaralyq kólik baǵdary boiynsha qabilettiligi artady», - dedi ol.
Vitse-ministrdiń aitýynsha kelisimdi qabyldaýdyń arqasynda Reseidiń ishki sý joldarymen tranzittik tasymal kólemin 2025 jylǵa qarai shamamen 250-300 myń tonnaǵa kóbeitý kózdelýde.
