Aqtaý qalasyna jaqyn ornalasqan №4 ónerkásiptik aimaǵynda shyqqan órttiń aýaǵa keltirgen zalalyn anyqtaý maqsatynda ekologtar synama jasady. Bul týraly Mańǵystaý oblystyq tótenshe jaǵdailar departamentiniń baspasóz qyzmeti habarlady, dep jazady Sputnik Qazaqstan.
Ainala zańsyz qoqysqa lyq toly bolǵan.
"Belgili bolǵandai, bul aýmaqta úiilip jatqan kólik dóńgelekteri órtenip, áp-sátte birneshe sharshy aýmaqty sharpyp úlgergen. Tez tutanatyn rezeńke dóńgelekterinen shyqqan jalyn alǵashynda bet qaratpady. Ázirge ottyń neden tutanǵany belgisiz. Oqiǵa ornyna alǵashqy bolyp politseiler men órt sóndirý qyzmeti jetti. Órt saldarynan zardap shekkender joq", - dedi departamenttegiler.
Sondai-aq Mańǵystaý oblystyq ekologiia departamentiniń zerthanalyq-taldamaly baqylaý bóliminiń mamandary kelip atmosferalyq aýadan synama aldy.
Kúieniń belgilengen normadan joǵary ekendigi anyqtalyp otyr.
Mańǵystaý oblystyq ekologiia departamenti basshysynyń orynbasary Saǵdat Hanseiitovtyń aitýynsha, órt oryn alǵan orynnyń qojaiyny nemese órtengen qaldyq iesi anyqtap, jaýapkershilikke tartý máselesi qaralady.
Quzyrly organdar órttiń neden shyqqanyn anyqtaýǵa kiristi.
Aqtaý qalalyq politsiia basqarmasy basshysynyń orynbasary Iliias Asqarulynyń aitýynsha, órttiń sebep-saldary aldaǵy ýaqytta anyqtalatyn bolady. Oqiǵa ornyna qaýipsizdikti qamtamasyz etý maqsatynda jeke quramnyń 30 politsiia qyzmetkeri men 4 ekipaj tartylǵan.
Esterińizge sala keteiik, 18 qyrkúiekte tańerteń Aqtaý qalasy ústindegi qara tútin jurttyń alańdaýshylyǵyn týdyrdy. Turǵyndar áleýmettik jelide tútindep jatqan jerdiń videosyn jariialady.
"Búgin, 18 qyrkúiekte, saiajailar jaqtaǵy óndiristik alańda birdeńe órtenip jatyr", - dep jazdy video avtory.
Al turǵyndar kommentariide "tútin qala ishine tarap ketti", "qaita oq-dáriler qoimasy joq", "bizdi bireý ýlap jatqan joq pa?" dep pikir qaldyrdy.
