Búgin M.Áýezov atyndaǵy Qazaq memlekettik akademiialyq drama teatrynda 22, 23 qazan kúnderine tusaýkeseri josparlanyp otyrǵan 91-maýsymnyń alǵashqy premerasy "Aqtastaǵy Ahiko" dramasyna arnalǵan press konferentsiia ótti. Bul týraly M.Áýezov teatrynyń Baspasóz qyzmeti bólimi habarlady.
Press konferentsiiaǵa teatr direktory, Qazaqstannyń eńbek sińirgen qairatkeri Erlan Bilál, qoiylym rejisseri, "Qazaq áýenderi" AQ Prezidenti, Qazaqstannyń eńbek sińirgen qairatkeri Ashat Maemirov, pesa avtory, teatr dramatýrgi Madina Omarova, spektaklde basty Ahiko rolin oryndaýshy akter, Qazaqstannyń eńbek sińirgen qairatkeri Dýlyǵa Aqmolda, Ana rolin oryndaýshy aktrisa, Qazaqstannyń eńbek sińirgen qairatkeri Danagúl Temirsultanova qatysty.
Teatr direktory Erlan Bilál: "El Táýelsizdiginiń 25 jyldyǵyna teatr áleminiń de qosar úlesi bar. Olai deitinimiz, osynaý ataýly kúnge arnalyp, Keńes odaǵy Karlag lageriniń tutqyny Ahikonyń ómiri men bastan keshken oqiǵalary týraly "Aqtastaǵy Ahiko" dramasynyń premerasyna daiyndyq jumystary júrgizilip jatyr. Bul spektakldiń ideiasy budan bir-eki jyl buryn gastroldik saparda júrgen kezimde paida boldy. Sonda Karlag týraly on segizge jýyq kitap jazǵan qazirgi Qazaqstan Respýblikasy Parlamenti Májilisiniń depýtaty Nurlan Dýlatbekovpen jolym túiisip, áńgime ústinde meniń Karlagqa baryp qaitýymdy ótingen bolatyn. Men kele salysymen, atalǵan lager týraly bir pesanyń dúniege kelýine sebepker bolsaq degen oiyn aitty. Mine, sol ideianyń nátijesinde búginde qalyń kórermenge "Aqtastaǵy Ahiko" dramasyn usynbaqshymyz", - dedi.
Spektakl rejisseri Ashat Maemirov óz kezeginde: "Táýelsizdik alǵannan keiin buryn tyiym salynǵan ultymyzdyń aqtańdaq tustaryndaǵy qasiretti áriptermen jazylǵan jaǵdailar týraly taqyryptar óner salalarynyń árqaisysynda bas kótere bastady. Osy qasirettiń biri - 30 jyldardaǵy ult ziialylarynyń, sonymen qatar poliak, orys, nemis, evrei syndy ózge ult ókilderiniń qýǵyn-súrgin kórip, jappai lagerlerde nebir azapty kezeńdi bastan keshkendigi. Búginde sol zulmat zamannyń kórinisi retinde teatr sahnasynda "Aqtastaǵy Ahiko" spektakli qoiylmaqshy. Bul spektakldiń kórermenderge, ásirese jastarǵa tárbielik máni zor bolady dep oilaimyn", - dedi.
Qazaqstannyń eńbek sińirgen qairatkeri, rejisser Ashat Maemirov sahnalaǵan bul qoiylym - teatr ujymynyń Qazaqstan Respýblikasynyń Táýelsizdiginiń 25 jyldyǵyna arnaǵan úlken jobasy.
Ult portaly
