Ál-Farabi atyndaǵy Qazaq ulttyq ýniversitetinde «Aqtaban shubyryndy, alqakól sulama: oqiǵalary, sebepteri, saldary men sabaqtary» taqyrybynda halyqaralyq ǵylymi-tájiribelik konferentsiia ótti. Qazaq halqynyń tarihyndaǵy qaraly kezeńdi qamtyǵan bul oqiǵaǵa biyl – 300 jyl.
Is-sharaǵa belgili qoǵamtanýshy ǵalymdar, sheteldik jáne otandyq tarihshylar, ziialy qaýym ókilderi, memlekettik jáne qoǵamdyq uiymdardyń ókilderi qatysty.
Konferentsiia ashylýynda tarih fakýltetiniń dekany, tarih ǵylymynyń doktory Dosbol Baiǵonaqov Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaevtyń joldaǵan hatyn oqyp berdi.
«Aqtaban shubyryndy, alqakól sulama – qazaq tarihyndaǵy eń aýyr kezeńniń biri. Tarihtyń osy bir qaraly kezeńi keiingi urpaqqa «Elim-ai» áni arqyly jetti. Biyl osy qasiretti oqiǵaǵa – 300 jyl. Búgingi konferentsiia barysynda tarihshylar men ǵalymdar tarihi oqiǵanyń sebepteri men saldaryn jańa kózqaraspen jan-jaqty saralap, ǵylymi tujyrymdamalaryn bildiredi dep senemin», – delingen hatta.
Sondai-aq sharada Mámbet Qoigeldi, Janǵara Dádebaev, Qanseiit Ábdezuly, Bereket Káribaev, Amanjol Qalysh jáne t.b. ǵalymdar men tarihshylar baiandama jasady.
Ǵylymi basqosýda mamandar HVIII ǵasyrdyń 20-jyldaryndaǵy qazaq tarihynyń kúrdeli kezeńderin zerdeleý jáne qazaq halqynyń basqynshylyqqa qarsy kúresin zertteý máselelerin talqylady.
Konferentsiia aiasynda «Alash isi. 1920-1930 jj. OGPÝ júrgizgen jasandy tergeý isiniń qujattary men materialdary» atty kitaptyń tusaýy kesildi.
Jiyn barysynda «XVII-XVIII ǵǵ. Qazaq memleketiniń ishki jáne syrtqy saiasaty», «Qazaq-jońǵar qatynastary», «Qazaq qoǵamyndaǵy batyrlar men bilerdiń róli» taqyryptary da qamtyldy.
Qaragóz SIMÁDIL,
ál-Farabi atyndaǵy QazUÝ-diń
Baspagerlik, redaktorlyq jáne dizainerlik óner kafedrasynyń oqytýshysy
