Katonqaraǵai aýdanyndaǵy Aqsý 11 jyldyq mektebi sharýashylyqqa qajetti sýdy kún batareialarynyń kómegimen ysytyp otyr. Aqsý mektebiniń direktory Gúlmira Bazaeva mektep shatyryna ornatylǵan shaǵyn ǵana kún batareialary plastinkalarynyń mamyr aiynan beri mektepke birneshe júz myń teńgeni únemdeýge múmkindik bergenin aitty.
Panty ónimderimen aty shyqqan Aqsý aýyly da tór Altaidaǵy ózge eldi mekendermen birge jyldan-jylǵa yqshamdalyp, kishireiip barady. Aqsý aýyldyq okrýgine qarasty Jazaba, Aqsharbaq, Bekalqa aýyldarynyń biriniń mektebi jabylyp, biriniń mektepte oqityn balalary múlde azaiyp qalyp jatsa, Taldy aýyly múlde joiylyp ketipti.
- Aqsýdyń mańaiyndaǵy aýyldardyń balalary mektep janyndaǵy internatta oqyp jatyr, mektepte 132 oqýshy, mektep-internatta 17 bala bar, - deidi Aqsý mektebiniń direktory Gúlmira Bazaeva. - Mektepteri jabylyp qalǵan Bekalqa, Aqsharbaq aýyldarynyń balalary, biyldan bastap bastaýysh mektep qana bolyp qalǵan Jazaba mektebiniń balalary osy bizdiń mektep-internatta turyp oqyp jatyr.
Alystaǵy aýyldyń bilim ordasy jazda kúrdeli jóndeýden ótkizilipti. Mektep ujymy kún batareialarynyń naǵyz paidasyn osy jóndeý kezinde kórgen. Kúnnen alynǵan qýatpen ysytylyp otyrǵan syiymdylyǵy 300 litrlik boilerdiń ystyq sýy eden, ashana ydystaryn jýýǵa, ózge de sharýashylyq jumystaryna paidalanylyp keledi. Kún batareialarynyń sýdy ysytý qabileti kúnniń kózi joǵalyp ketetin sýyq kúnderi de kemimeidi, joǵalmaidy. Mektep ujymy bolashaqta mekteptiń jylytý júiesin de osy kún batareialarynan alynatyn ystyq sýmen jylytýǵa kóshirmek oida.
Kún batareialaryn oblystaǵy birneshe áleýmettik nysandarmen birge osy mektepke ornatyp bergen «Qasietti Ór Altai» qoǵamdyq qorynyń direktory Didar Dalimanov Aqsý mektebiniń túlegi. Mektep ustazdary men oqýshylary endi osy qordyń kómegimen túimedaq, melissa, kalendýla siiaqty emdik shópterdi egip, keptirý jobasyn júzege asyrýdy kózdep otyr. Jinap alynǵan emdik shópter «Aqsý-DEEN» seriktestiginiń farmakologiialyq óndirisine tapsyrylmaq.
Alty ai qysta aq qardyń astynda jatatyn Aqsý aýylynyń ustazdary kún batareialarymen mektep qarjysyn únemdep qana qoimai, oqýshylardy tiimdi kásippen ainalysýǵa baýlyp, tabys túsirýdiń joldaryn osylai kórsetip, úiretýde.
Janargúl Muqatai
