Qutqarýshylar 10 qazanda Aqsý ózeni mańynda tapqan máiit úndistandyq stýdenttiń emes, belgisiz áieldiń máiiti bolyp shyqty. Maýsymnyń basynda sýǵa batyp ketken eki stýdent áli izdestirilip jatyr. Bul týraly Túrkistan oblysynyń Tótenshe jaǵdailar departamenti málim etti, - dep habarlaidy Tengrinews.kz.
Qutqarýshylardyń aitýynsha, ózenniń oń jaǵalaýynan tabylǵan máiitti sýda uzaq jatqandyqtan anyqtaý múmkin bolmaǵan. Ol úndistandyq stýdenttiń máiiti emes, áieldiki ekeni meditsinalyq saraptama qorytyndysynan keiin ǵana belgili bolǵan. Túrkistan oblysy TJD baspasóz qyzmeti málimetinshe, qatelik qutqarýshylarǵa sýǵa batqan áiel týraly buryn aqparat túspegendikten bolǵan.
"Meditsinalyq saraptama qorytyndysy nátijesinde izdestirý-qutqarý jumystary kezinde tabylǵan máiit úndistandyqtyń denesi emes ekeni anyqtaldy. Tabylǵan máiit jeke basyn anyqtaý úshin politsiiaǵa tapsyryldy. Tótenshe jaǵdailar departamenti Túrkistan oblysyna buǵan deiin taǵy bir adamnyń sýǵa ketkeni týraly aqparat túspegen", - dedi Túrkistan oblysy Tótenshe jaǵdailar departamenti Jedel-qutqarý jasaǵynyń basshysy Dáýren Taýbaev.
Qazir bul is Túrkistan oblystyq PD baqylaýynda. Tólebi aýdanynda tabylǵan máiitke qatysty tergeý júrip jatyr.
"10 qazanda Túrkistan oblysy Tóle bi aýdany politsiiasynyń kezekshi bólimine oblystyń Tótenshe jaǵdailar departamentinen Aqsý ózeninen belgisiz máiit tabylǵany týraly habarlama kelip tústi. Aýdandyq politsiia bóliminiń jedel-tergeý toby dereý oqiǵa ornyna attandy. Tekserý barysynda ózenniń oń jaǵalaýynan tabylǵan máiittiń sýda uzaq bolýyna bailanysty taný múmkin bolmaǵany anyqtaldy. Saraptama júrgizildi. Saraptama qorytyndysyna sáikes, máiit áieldiki ekeni anyqtaldy. Bul derek Tóle bi APB-da tirkeldi. Qazirgi ýaqytta sotaldy tergeý amaldary júrgizilip, oqiǵanyń barlyq mán-jaiy anyqtalyp jatyr", - dedi Túrkistan oblysy Politsiia departamentiniń baspasóz qyzmeti ókilderi.
Aita keteiik, sýǵa ketken eki úndistandyq azamattyń denesi áli tabylǵan joq. Izdeý jumystary áli jalǵasyp jatyr. Eske salaiyq, olar Ońtústik Qazaqstan meditsinalyq akademiiasynda oqyp, maýsymnyń aiaǵynda joǵalyp ketken.
